Óskemen halqynyń aýa sapasyna qatysty shaǵymy: Ekologtar tekserý júrgizdi

ÓSKEMEN. KAZINFORM – Búgin Óskemen qalasynyń turǵyndary aýa sapasynyń kúrt nasharlap ketkenine shaǵymdanǵan. Soǵan oraı ekologtar tekserý júrgizdi.

ShQO ekologııa departamenti baspasóz qyzmetiniń málimetine súıensek, mamandar áleýmettik jelide taraǵan vıdeolarǵa sholý jasap, halyq aýa sapasy lastandy degen jerlerge bardy. 

«Olar aýa sapasyna aspaptyq zertteýler júrgizdi. Gagarın býlvarynda azot dıoksıdi men formaldegıd deńgeıi gaz analızatorynyń kómegimen ólshendi. Ólsheý nátıjeleri boıynsha Gagarın býlvary kóshesi, 9 úı mekenjaıynda hlorsýteginiń shekti ruqsat etilgen kontsentratsııasynan asyp ketýi tirkeldi. Basqa lastaýshy zattar boıynsha shekti ruqsat etilgen kontsentratsııadan asyp ketý deregi anyqtalǵan joq», - delingen aqparatta. 

Ekologııa departamenti jaǵdaıdy zerdelep, jeldiń baǵytyn, aýdandaǵy kásiporyndardyń jumysyn jáne yqtımal lastaný kózderin anyqtap jatyr. Sonyń nátıjeleri boıynsha aýany lastaýy múmkin degen kásiporynǵa qatysty tekserý bastalady.

Eske salsaq, osyǵan deıin Óskemen turǵyndary aýa sapasynyń kúrt nasharlaǵanyna shaǵymdanǵanyn habarlaǵan edik.