Óskemen ǵalymdary jasap shyǵarǵan tıtan ımplanttar kimderge tegin beriledi

ASTANA. KAZINFORM – Ǵylym jáne joǵary bilim mınıstri Saıasat Nurbek Úkimet otyrysynan keıin ótken baspasóz máslıhatynda tıtannan jasalǵan otandyq ımplanttar qandaı naýqastarǵa tegin beriletinin aıtty.

- Bul jerde bári zań boıynsha jasalady. Mysaly, kvota arqyly kelgen, áleýmettik osal toptardan shyqqan azamattarǵa, tegin kepildendirilgen memlekettik medıtsınalyq kómek alatyndarǵa tegine beriledi. Qazir Óskemende jekemenshik ınvestormen birge zaýyt quryp jatyrmyz. Óıtkeni ýnıversıtettiń ishki ınvestıtsııasy (D.Serikbaev atyndaǵy Shyǵys Qazaqstan tehnıkalyq ýnıversıtet) jetpeıdi, - dedi ol.

Mınıstr buıymdardyń baǵasy áli eseptelmegenin aıtady.

- Investorlar medıtsınalyq kompanııa quryp, búkil aýrýhanalarǵa satady. Biraq ol óte arzan bolady. Nege deseńiz, tıtan ózimizdiki, kedendik alymdar da joq. Marketıngti áli eseptegen joq. Sondyqtan naqty baǵasyn áli aıta almaımyn. Sheteldik balamalarynan keminde birneshe ese arzan bolady, - dedi vedomstvo basshysy.

Aıta keteıik, búgin mınıstr Saıasat Nurbek Úkimet otyrysynan keıin ótken baspasóz máslıhatynda tıtannan jasalǵan otandyq ımplanttardy tanystyrdy.