Óskemen basqa ýaqyt beldeýine óte me – ákim jaýaby

ASTANA. KAZINFORM – Shyǵys Qazaqstan oblysynyń ákimi Ermek Kósherbaev jańa ýaqyt beldeýiniń oblys turǵyndarynyń turmysyna qalaı áser etkeni týraly pikir bildirdi.

«Óskemen halqy ýaqyt beldeýiniń aýysqany qolaısyzdyqtar týǵyzǵanyn aıtyp kóp shaǵymdandy. Ákimdik osy shaǵymǵa qalaı qulaq asyp jatyr? Tıisti memlekettik organdarǵa osy másele týraly qandaı da bir usynys berdińizder me?», - dep surady jýrnalıst Parlament palatalarynyń birlesken otyrysynyń aldynda. 

Ákim bul másele boıynsha Saýda jáne ıntegratsııa mınıstrliginen jaýap kútip otyrǵanyn aıtty.

«Jasyratyn eshteńe joq, halyqtyń keıbiri aıtyp jatyr. Ásirese qalada, qalanyń mańaıynda turatyndar ýaqyt beldeýine baılanysty óz pikirlerin bildirip jatyr. Jaqyn arada mınıstr A.Shaqqalıev biz jaqqa kelip ketti. Pikirlermen tanystyrdyq. Ol «oılanamyz, óz sheshimimizdi sizderge jetkizemiz» dep ketti. Sol ne aıtatynyn kútip otyrmyz», - dedi aımaq ákimi.

Ermek Kósherbaevtyń paıymdaýynsha, qazirgi ýaqyt beldeýi tańerteń balalaryn mektepke aparatyn óskemendikterge qolaıly kórinedi.

«Naqty qandaı sheshim qabyldanatynyn aıta almaımyn. Qazirgi ýaqyt beldeýi qolaısyz dep otyrǵan búkil halyq emes. Ásirese qaladaǵylar. Tipten qasymdaǵy qyzmetkerlerden ondaı áńgimeni estip edim. Bir jaqsy jer bar. Qysta tańerteń mektepke barǵanda qarańǵyda emes, jaryqta baratyn boldy. Al eki, úsh aýysymmen oqıtyn mektepter buǵan deıin de úılerine qarańǵyda qaıtyp júrgen. Sondyqtan jańa ýaqyt beldeýiniń kesirinen qarańǵyǵa qalady dep oılamaımyn», - dedi oblys ákimi.