«Oskar» syılyǵyn tapsyrý rásimi 2029 jyldan bastap YouTube arqyly kórsetiledi

ASTANA. KAZINFORM — Bul týraly Amerıka kınoakademııasynyń málimdemesinde aıtyldy, dep habarlaıdy BBC.

Habarlamada atap ótilgendeı, Akademııa men YouTube arasyndaǵy kelisim 2033 jylǵa deıin eseptelgen. Alaıda CNN-niń habarlaýyna súıensek, bul kelisim oıyn-saýyq ındýstrııasy úshin betburys sát bolmaq. Óıtkeni translıatsııa dástúrli teledıdardan jahandyq strımıng platformasyna kóshedi.

Quqyqtar paketine marapattaý rásiminiń ózi, qyzyl kilemshe, beksteıdj jáne Gýbernatorlar balynyń translıatsııalary kiredi. Barlyq kontent búkil álemdegi kórermender úshin tegin kórsetilmek.

«Kelisim taraptary platformanyń aýysýy shekaralardy joıyp, «Oskardy» halyqaralyq aýdıtorııa úshin shyn máninde qoljetimdi etedi dep úmittenedi», dep jazady CNN.

Disney kompanııasyna tıesili ári «Oskardy» 50 jyldan astam ýaqyt boıy kórsetip kelgen ABC arnasy marapattaý rásimin endi úsh ret kórsetedi. 2028 jyly ótetin mereıtoılyq, 100-shi syılyq arna úshin sońǵysy bolmaq.

«Biz 2028 jyly áıgili syılyqtyń júz jyldyǵyn atap ótýmen birge aldaǵy úsh translıatsııany asyǵa kútemiz jáne Kınematografııalyq óner men ǵylym akademııasyna aldaǵy qyzmetinde tabys tileımiz», dep jazdy ABC ókilderi.

Aıta ketsek, buǵan deıin «Oskardy» endi JI kómegimen túsirilgen fılmder alýy múmkin ekenin jazdyq.