OSK-nyń birneshe kandıdatty tirkeýden bas tartýy zańdy ma – Zańgerler odaǵy pikir bildirdi
20 qarashaǵa josparlanǵan kezekten tys prezıdent saılaýyna 12 úmitker usynylǵanyn buǵan deıin de jazǵan edik. Ortalyq saılaý komıssııasy solardyń segizin ǵana kelesi kezeńge ótkizgeni de barshaǵa málim.
Olardyń tizimin taǵy bir eske salyp keteıik.
1. Jıgýlı Daırabaev - «Aýyl» halyqtyq-demokratııalyq patrıottyq partııasy;
2. Qasym-Jomart Toqaev – saıası partııalar men qoǵamdyq birlestikterdiń halyqtyq koalıtsııasy;
3. Nurlan Áýesbaev – Jalpyulttyq sotsıal-demokratııalyq partııasy;
4. Meıram Qajyken – «Amanat» Qazaqstan kásipodaqtar dostastyǵy» respýblıkalyq kásipodaqtar birlestigi;
5. Qaraqat Ábden – «Kásibı áleýmettik qyzmetkerlerdiń ulttyq alıansy» respýblıkalyq qoǵamdyq birlestigi;
6. Talǵat Erǵalıev - «Qazaqstan qurylysshylar odaǵy» respýblıkalyq zańdy tulǵalar birlestigi;
7. Saltanat Tursynbekova – «Qazaq analary - dástúrge jol» respýblıkalyq qoǵamdyq birlestigi;
8. Nurjan Áltaev – «Muqalmas» respýblıkalyq qoǵamdyq birlestigi;
9. Jumataı Álıev – «Halyq demografııasy» qoǵamdyq birlestigi;
10. Haırýlla Ǵabjalılov - «Oralmandardyń «Asar» birlestigi» respýblıkalyq qoǵamdyq birlestigi;
11. Baqyt Jańabaev – «Qazaqstandyq Fýtbol Áýeskerleri Lıgasy» qoǵamdyq birlestigi;
12. Fatıma Bızaqova - «Tájirıbelik psıhologııa» respýblıkalyq qoǵamdyq birlestigi.
Bulardyń 8-i Ortalyq saılaý komıssııasynyń uıǵarymy boıynsha saılaý týraly zańnama talaptaryna saı dep tanylǵan bolatyn.
https://kaz.inform.kz/news/saylauga-tuskisi-kelgenderdin-ishinde-8-kandidat-kana-talapka-say-bolyp-shykty_a3990306
Atap aıtsaq, Jıgýlı Daırabaev, Qasym-Jomart Toqaev, Nurlan Áýesbaev, Qaraqat Ábden, Meıram Qajyken, Saltanat Tursynbekova, Jumataı Álıev pen Baqyt Jańabaev Konstıtýtsııa men «Qazaqstan Respýblıkasyndaǵy saılaý týraly» QR Konstıtýtsııalyq zańynda qoıylatyn talaptarǵa sáıkes ekendigi týraly qaýlylar qabyldandy.
Al Haırýlla Ǵabjalılov pen Talǵat Erǵalıevtiń, Fatıma Bızaqovanyń Konstıtýtsııa men «Qazaqstan Respýblıkasyndaǵy saılaý týraly» QR Konstıtýtsııalyq zańynda qoıylatyn talaptarǵa sáıkes emestigi resmı málim etildi.
«Qazaqstan zańgerler odaǵy» respýblıkalyq birlestiginiń ókilderi Ortalyq saılaý komıssııasynyń bul sheshimi zań talaptaryna saı ekenin aıtyp otyr.
Atap aıtsaq:
1. Іshki ister mınıstrliginiń málimeti boıynsha, Haırýlla Ǵabjalılov týǵannan Qazaqstan Respýblıkasynyń azamaty emes.
Al Memlekettik qyzmet isteri agenttiginiń málimetinshe, Haırýlla Gabjalılovtyń memlekettik qyzmette nemese saılanbaly memlekettik laýazymdarda eńbek ótili joq. Osylardy eskerip, OSK músheleri onyń qujattaryn keri qaıtarýǵa biraýyzdan daýys bergen kórinedi.
2. Ortalyq saılaý komıssııasynyń Talǵat Erǵalıevke de qujattaryn qaıtaryp berýine osyǵan uqsas sebep negiz bolǵan. Onyń memlekettik qyzmettegi tájirıbesi tek úsh jyl tórt aı ekeni aıtylyp otyr. Bul tirkeýden bas tartýǵa negiz bolyp sanalady. Óıtkeni prezıdenttikke kandıdattarǵa qoıylatyn talap boıynsha, memlekettik qyzmette keminde bes jyl tájirıbesi bolýy kerek.
Onyń ústine Talǵat Erǵalıevti prezıdenttikke usynǵan «Qazaqstan qurylysshylar odaǵy» – zańdy tulǵalardyń respýblıkalyq birlestigi. Al «Qazaqstan Respýblıkasyndaǵy saılaý týraly» Konstıtýtsııalyq zańnyń 55-baby 1-tarmaǵynyń talaptary boıynsha, Prezıdenttikke úmitkerdi respýblıkalyq qoǵamdyq birlestikter usynýǵa quqyly.
3. Fatıma Bızaqovanyń da memlekettik qyzmette nemese saılanbaly memlekettik laýazymdarda qajetti mólsherde ótili joq degen málimet tirkelgen. Osyǵan baılanysty OSK ony da prezıdenttikke kandıdat retinde tirkeýden bas tartqan.
Osynyń bárin alǵa tartqan «Qazaqstan zańgerler odaǵy» respýblıkalyq birlestiginiń ókilderi Ortalyq saılaý komıssııasynyń qorytyndylaryn negizdi jáne Konstıtýtsııa men qoldanystaǵy zańnamanyń talaptaryna sáıkes dep taýyp otyr.
Qazaqstan zańgerler odaǵy Nurjan Áltaevtyń tóńiregindegi daýǵa tolyq túsinikteme berý úshin onyń OSK-ǵa ótkizgen qujattaryn kórý kerek dep otyr. Buǵan deıin «Muqalmas» respýblıkalyq qoǵamdyq birlestigi joǵary organynyń Nurjan Áltaevty prezıdenttikke kandıdat etip usynǵanyn teriske shyǵaratyn daýly málimetter tarap, is sotqa jetken bolatyn.
Azamattyq is júrgizý kodeksiniń 21-baby boıynsha, OSK sot aktisin oryndaý úshin prezıdenttikke kandıdat Nurjan Áltaevty tirkeýdi toqtatty.
Zańgerler odaǵy osyny alǵa tartyp, Ortalyq saılaý komıssııasynyń bul sheshimi de negizdi ári zańdy dep baǵalaǵan.
Zańgerler Nurjan Áltaevtyń saılaý naýqanynyń kelesi kezeńine ótýi endi sot tártibimen ǵana sheshiletinin aıtyp otyr.
Eske salsaq, prezıdentikke úmitkerler Konstıtýtsııa men «Qazaqstan Respýblıkasyndaǵy saılaý týraly» QR Konstıtýtsııalyq zańynda qoıylatyn talaptarǵa sáıkes bolsa ǵana, saılaý naýqanynyń kelesi kezeńine jiberileýi kerek edi.
Ol talaptar mynandaı:
- týmysynan Respýblıka azamaty bolýǵa tıis;
- QR aýmaǵynda sońǵy on bes jyl boıy turýǵa tıis;
- joǵary bilim;
- qyryq jasqa tolǵan;
- belsendi saılaý quqyǵyna ıe bolýǵa tıis;
- memlekettik qyzmette nemese saılanbaly memlekettik laýazymdarda keminde 5 jyldy quraıtyn jumys tájirıbesi bolýǵa tıis;
- memlekettik tildi erkin meńgerýi tıis.
Jalpy, úmitker usynýǵa uzyn sany 19 kún berilse, olardyń zańnama talaptaryna sáıkestigin anyqtaýǵa 29 kún kózdelgen, ıaǵnı bul shara 21 qazanǵa deıin jalǵasady.
Osy aralyqta saılaý zańnamasyna saı tolyq iriktelgen kandıdattar oblystardyń, respýblıkalyq mańyzy bar qalalardyń jáne astananyń kem degende úshten ekisiniń atynan teńdeı ókildik etetin saılaýshylar sanynyń kem degende 1% qolyn jınaý qajet. 1 shildedegi jaǵdaı boıynsha Ortalyq saılaý komıssııasy Qazaqstan Respýblıkasy saılaýshylarynyń tizilimine daýys berý quqyǵy bar 11 827 277 azamatty engizgen. Osylaısha, ár kandıdatty qoldaý úshin saılaýshylardyń 118 273 senim qoly jınalýy kerek.
Ol jınalǵan qoldardyń durystyǵy da 21 qazanǵa deıin tekserilip bitýi kerek.
