Osy aptada ár mektepte ustazdar men ata-analar bala qaýipsizdigin talqylaıdy
ASTANA. KAZINFORM — Qazaqstandyq ata-analarmen balalardyń qaýipsizdigin qamtamasyz etý máseleleri talqylanady.
23-27 qyrkúıek aralyǵynda elimizdiń barlyq mektepterinde balalardyń qaýipsizdigine arnalǵan ata-analar jınalysy ótedi.
Jınalysta ata-analardyń bala ómirindegi, sondaı-aq onlaın keńistiktegi qaýipsizdigine qatysty jaýapkershiligi týraly sóz qozǵalady.
Ata-analarǵa qaýip-qaterdi der kezinde qalaı anyqtaý jáne olardy boldyrmaý úshin qandaı sharalar qoldaný kerektigi týraly qadamdyq usynym beriledi.
Olardyń ishinde — balanyń minez-qulqyn baqylaý, áleýmettik jelilerdegi belsendilik monıtorıngi, mektep ortasyndaǵy qurdastarymen qarym-qatynasy kiredi.
Budan bólek, mamandar balamen turaqty qarym-qatynas jasaýdyń, ashyq dıalog úshin senimdi orta qurýdyń jáne ata-analardyń balasynyń ómirine udaıy qatysýynyń mańyzyna nazar aýdardy.
«Bala qaýipsizdigi — ata-ana, pedagog, árbir eresek adam úshin basymdyqqa ıe bolýy tıis. Balamen ashyq dıalog qurý, onyń ómirine udaıy qatysyp otyrý, tsıfrlyq qurylǵylardy baqylaý jáne balamen qaýipsizdik taqyrybynda áńgimelesý — bul problemalardyń aldyn alýǵa kómektesetin negizgi qadamdar. Ata-ananyń mindeti — balanyń júris-turysyn baqylap qana qoımaı, sonymen qatar óz balasymen ony árqashan tyńdaýǵa jáne kómektesýge daıyn ekenin bildiretin senimdi qarym-qatynas qalyptastyrý. Bala — bolashaǵymyz, olardyń salamattylyǵyn saqtaý tikeleı bizge baılanysty», — dep atap ótti QR Oqý-aǵartý mınıstrligi bala quqyqtaryn qorǵaý komıtetiniń tóraǵasy Nasymjan Ospanova.
Esterińizge sala keteıik, bıylǵy oqý jylynan bastap bilim berý uıymdarynda apta saıyn synyp saǵaty aıasynda «Qaýipsizdik sabaqtary» ótip júr.
Sabaq kezinde ınternettegi táýekelden qorǵaný, ózin-ózi saqtaý daǵdylaryn damytý jáne túrli qaýip-qater jaǵdaıynda durys áreket etý taqyryptary qamtylyp jatyr.
Sondaı-aq balalar men ata-analar jáne pedagogter úshin psıhologııalyq, quqyqtyq jáne ádistemelik keńes alýǵa bolatyn psıhologııalyq qoldaý ortalyqtary ashyldy.
Al balalarǵa jasalǵan qatygezdikke kýá bolsańyz, táýlik boıy qyzmet etetin «111» nómirine habarlasýǵa bolady.
