Oryngúl Kóshqalıeva: jumysta - polıtseımin, úıde - kópbalaly anamyn

ATYRAÝ. QazAqparat – Turǵyndardyń qaýipsizdigi men qoǵamdyq tártipti qadaǵalaıtyn polıtseı qyzmetkerleriniń qatarynda qyz-kelinshekter az emes. Solardyń biri polıtsııa podpolkovnıgi Oryngúl Kóshqalıeva, dep habarlaıdy QazAqparat.

Oryngúl Kóshqalıevanyń Atyraý qalalyq polıtsııa basqarmasyna jumysqa ornalasqanyna 20 jylǵa jýyqtady.

Іshki ister organyndaǵy eńbek jolyn 1997 jyly qalalyq polıtsııa basqarmasynyń medıtsınalyq aıyqtyrǵyshynda feldsher bolyp bastaǵan. Medıtsına salasynda jumys isteı júrip, ishki ister organdarynyń qyzmetine qyzyǵýshylyq tanytty. H.Dosmuhamedov atyndaǵy Atyraý memlekettik ýnıversıtetiniń zań fakýltetin bitirgen.

Keıin medıtsınalyq aıyqtyrǵyshtyń aldyn alý kabınetiniń bastyǵy laýazymyna taǵaıyndalady. Alkogoldik ishimdik iship, aıyqtyrǵyshqa «qonaqqa» jıi keletinderdi nazarǵa aldy. Olarǵa ishimdiktiń zardaby týraly túsindirý jumysyn júrgizdi. Al, 2009

jyly qalalyq polıtsııa basqarmasy kámeletke tolmaǵandardyń isteri jónindegi bólimine aýystyryldy. Munda bastapqyda ınspektor, aǵa ınspektor mindetin atqardy. Keıin bólim basshysynyń orynbasary, sodan soń ıývenaldy polıtsııa bólimshesiniń bastyǵy boldy.

«Bala kezden polıtseı bolýdy armandadym. Óıtkeni, qoǵamnyń tynyshtyǵyn, adamdardyńqaýipsizdigin saqtaýǵa úles qosqym keldi. Polıtseıdiń jumysy ári qyzyqty, ári qıyn ǵoı. Ár qyzmetkerge júkteletin jaýapkershiligi zor. Jumysta – polıtseımin, al, otbasymda – kópbalaly anamyn. Men osy ustanymnan aınyp kórgen emespin. Sebebi, men óz

jumysymdy jaqsy kóremin», -deıdi polıtsııa podpolkovnıgi Oryngúl Kóshqalıeva.

Qazir ol oblystyq polıtsııa departamentiniń jergilikti polıtsııa qyzmetinde erekshe

tapsyrmalar jónindegi aǵa ınspektory laýazymyn atqarady. Jalpy eńbek ótili – 30 jyl.

Onyń 19 jylyn ishki ister organyna arnaǵan.

«Kámeletke tolmaǵandar isi jónindegi ınspektorlardyń mindetine jasóspirimder

arasyndaǵy quqyq buzýshylyqtardyń aldyn alý, qadaǵalaýsyz, qamqorlyqsyz qalýynyń

sebebin anyqtaý jatady. Bir qaraǵanda jeńil jumys sııaqty kórinýi múmkin. Biraq, ár jasóspirimniń taǵdyryna atústi qaraýǵa bolmaıdy. Jasóspirimder jas shybyq sekildi ǵoı. Ony ata-anasy, ortasy qalaı tárbıelese, taǵdyry solaı qalyptasady. Qatelikke boı aldyrýy, shalys qadam basýy múmkin. Sol sebepten, jaóspirimdermen jumys isteıtin ınspektor – polıtsııa qyzmetkeri ǵana emes, eń aldymen, pedagog ári psıholog. Eń qıyny, balalarmen jumys isteý. Biraq, ózimniń kóp jyldyq tájirıbeme súıenip, jaısyz otbasynyń ata-anasyn qaıta tárbıeleý odan da qıynyraq ekenine kóz jetkizdim», -deıdi polıtsııa podpolkovnıgi.

Oryngúl Janǵalıqyzy – kópbalaly ana. Qazir kúıeýi Abat ekeýi 5 balany aıalap ósirýde. Qyzy Aınagúldiń óz otbasy bar, 3 bala tárbıelep otyr. Eki uly – Arsen – 14-te, Bekzat – 13-te.

Ekeýi de boks jáne dzıýdomen aınalysady. Balalarynyń eń súıkimdisi – Ámına men Ázıza.

Bıyl 5 jasqa tolǵan egizder balabaqshaǵa baryp júr.

«Ár áıel úshin eń basty baılyq – otbasyndaǵy úılesim. Otbasyndaǵy jylýlyq pen tatýlyq jumysyńdy alǵa basýyna oń áserin tıgizedi», -deıdi Oryngúl Kóshqalıeva.

Eske sala ketelik, budan buryn Atyraýda jaqsy nátıjemen kózge túsken polıtseılerdiń

analary marapattalǵanyn jazǵan bolatynbyz.