Orynbordan Aqtóbege kóship kelgen zeınetker ulttyq ónerdi jańǵyrtty

AQTÓBE. QazAqparat – Aqtóbe oblysy Mártók aýdanynda turatyn Rabıǵa Ispýlatova qazir ilmek pen jipti paıdalanyp, túrli buıym toqyp júr. Qarııa osydan 10 jyl buryn ákesiniń kindik qany tamǵan ólkege oralyp, qonystanǵan. Qolónerde bilgen, kórgenin qazir oqýshylarǵa úıretedi, dep habarlaıdy QazAqparat tilshisi.

Rabıǵa Ispýlatova kishkentaı kezinde ilmekpen toqýdy úırendi. Zeınetke shyqqan soń ǵana osy iske den qoıa kirisip, qazir kózdiń jaýyn alar túrli buıym toqyp júr.

«Túrli-tústi jipti dúkennen satyp alyp júrmin. Qolyma jip pen ilekti alǵanda toqıtyn buıymymdy oılastyramyn. Bári óz oıymnyń jemisi. Bas kıim, túrli kólemde sómke, tipti túrli jemisti toqydym. Keıin qazaqy qoıdyń júnin kádege jaratýdy oıladym. Sebebi qoı qyryqqan soń onyń júni kádege aspaı jatyr. Ony jınap alyp, ózim kıiz bastym. Sóıtip kádesyıǵa arnap torsyq jasadym. Óte ádemi kórinedi»,- dedi sheber Rabıǵa Ispýlatova.

Sheber óz isin súıedi. Keıbir buıymdy bir kúnde toqyp shyǵady. Ári kez kelgen buıymnyń, daıyndaǵan zattyń astary bar. Máselen, sebettegi gúl qazaqtyń darhan dalasyn bildiredi. Sebetti jasyl tústi jippen kómkerip, túrli-tústi qylǵaldaq toqyǵan.

«Osydan 10 jyl buryn otbasymmen kóship keldim. Oǵan deıin Orynbor oblysynda turdym. Qazir qyzymmen birge túuramyn, otaǵasy kóz jumdy. Tarıhı Otanyma oralǵan soń osy iske qyzyqtym. Suranys bolǵan kezde satyp jiberemin. Al ózgesi úıimde tur. Sońǵy kezderi kartınalar da daıyndap júrmin. Eger jumys isteý oıda bolsa, bazardan jip satyp alyp, kásipke aınaldyrýǵa bolady. Sońǵy kezderi ulttyq naqyshtaǵy kilemshe toqý qyzyqtyrady», - dedi ol.

Zeınetker barlyq jumysty ózi isteıdi.

«Balalarǵa úıde, mektepte de úıretemin. Biz ulttyq qolónerdi damytyp, qaıta túletýimiz kerek dep esepteımin. Óte ádemi dúnıeler qashanda sánde bolady», - dedi Rabıǵa Ispýlatova.