Ortalyq Azııada ǵaryshty zertteý ortalyǵyn ashý josparlanýda

ASTANA. QazAqparat - QR Qorǵanys jáne aeroǵarysh ónerkásibi mınıstrligi delegatsııasynyń (QAÓM) Qyrǵyzstannyń Ulttyq ǵylymdar akademııasyna (UǴA) sapary aıasynda jetekshi ǵalymdarmen, ǵaryshkerlermen, Qazaqstannyń halyq batyry Aıdyn Aıymbetovpen kezdesý ótkizildi, dep habarlaıdy «QazAqparat» HAA tilshisi.

«Qazaqstan Ǵarysh Sapary» ulttyq kompanııasynyń ǵarysh tehnologııalary boıynsha vıtse-prezıdenti Aıdyn Aıymbetov qazaq ǵaryshynyń búgingi jetistikteri týraly, ǵarysh tehnologııalarynyń eldiń búgingi ekonomıkasy men qaýipsizdigine qoldaný múmkindikteri týraly aıtyp berdi.

Qyrǵyzstan UǴA vıtse-prezıdenti Osmon Toǵysaqov ǵarysh monıtorınginiń tabıǵı resýrstarǵa baǵa berý, tuqym sebý sapasy men sybaılas jemqorlyqty baqylaýǵa deıingi salada tájirıbelik mańyzy artyp kele jatqanyn atap ótti.

«Biz Ortalyq Azııada birikken ǵarysh zertteý ortalyǵyn qurýdyń múmkindikterin talqyladyq. Onyń jumysyna bizdiń ǵalymdar da tikeleı qatysa alady. Sondaı-aq, birlesken zertteýdi ary qaraı talqylaý úshin 2018 jyly ótýi josparlanyp otyrǵan akademııalyq ınvestıtsııalyq-ınnovatsııalyq forýmǵa qazaq áriptesterimizdi shaqyryp otyrmyz», - dedi O.Toǵysaqov.

Qyrǵyzstannyń ǵalymdary qazaqstandyq ǵaryshker Aıdyn Aıymbetovty erekshe yqylaspen kútip aldy. Aıdyn Aıymbetov óz kezeginde iri ǵylymı áleýetke ıe Qyrǵyzstannyń Ǵylym akademııasymen ǵarysh salasynda seriktestik ornatý múmkindigin aıtyp ótti. Onyń aıtýynsha, birlesken jobalardyń aıtarlyqtaı keleshegi bar.