Ortalyq Azııa elderiniń óńirlik biregeıligi qalyptasyp keledi – Qyrǵyzstannyń memlekettik hatshysy

ASTANA. QazAqparat – Elordada óitp jatqan Ortalyq Azııa medıaforýmynda Qyrǵyz Respýblıkasynyń memlekettik hatshysy Súıinbek Qasmambetov sóz sóılep, tarıhı biregeılik úshin zııatker elıtalardy dıalogqa tartýdy usyndy, dep habarlaıdy QazAqparat tilshisi.

«Osyndaı kúrdeli jyldyń sońynda biz qonaqjaı Astanaǵa jınalyp otyrmyz. KSRO ydyraǵan soń Ortalyq Azııanyń bes eli birden táýelsizdik alyp, ózderiniń damý modelimen, strategııalyq maqsattaryn anyqtaýmen belsendi aınalysty. Bul ońaı jol emes. Shynyn aıtqanda, sol jyldary óńirlik biregeılik keıinge qaldyryldy, barlyǵy ózderiniń ishki máselelerine kóńil bóldi. Táýelsizdiktiń 30 jylynda Ortalyq Azııanyń barlyq elderi halyqaralyq yntymaqtastyqty jolǵa qoıyp, úlken qalyptasý jolynan ótti», - dedi Qyrǵyz Respýblıkasynyń Memlekettik hatshysy forýmda.

Súıinbek Qasmambetov Ortalyq Azııada múddeleri bar barlyq syrtqy oıynshylarmen ózara is-qımyl júrgizilip jatqanyn atap ótti.

«Olar: Qytaı, Túrkııa, Reseı, Eýropa Odaǵy, AQSh, Úndistan, Japonııa, Koreıa, Iran. Biraq basty másele – olardyń aımaqqa degen óz kózqarasy bar. Bizde mundaı ortaq kózqaras joq. Óńir retinde biz bireýdiń kún tártibi aıasynda áreket etip júrmiz», - dedi ol.

Osy oraıda spıker Ortalyq Azııa elderiniń ıntegratsııasy, óńirlik biregeıligi, ortaq mádenı murany iske asyrý aspektisine jiti toqtaldy.

«Biz geografııalyq turǵyda birtutaspyz, tildik tamyrlarymyz, tarıhymyz, mádenıetimiz, musylman álemine qatystylyǵymyz ortaq. Bul rette bizdiń óńirlik biregeıligimiz qalyptasý satysynda tur. 30 jylda biz áli de birtutas geosaıası sýbekt bolǵan joqpyz. Sondyqtan jalpy mádenı túbir haqynda habardar bolý qajet. Osy taqyryp boıynsha pikirtalas bastaý kerek dep sanaımyn. Tarıhı biregeılik týraly sanaǵa oralý úshin zııatker elıtalardy dıalogqa tartý kerek», - deıdi S. Qasmambetov.

Buǵan deıin Ózbekstan Prezıdenti janyndaǵy strategııalyq jáne halyqaralyq zertteýler ınstıtýtynyń dırektory Eldor Arıpov ortaq mádenı qundylyqtar men dástúrler negizinde yntymaqtastyqty keńeıtý anaǵurlym tıimdi ekenin aıtqan edi.