Ortalyq saılaý komıssııasy alǵash ret EQYU DIAQB shtab-páterine bardy
ASTANA. KAZINFORM – Ortalyq saılaý komıssııasynyń Tóraǵasy Nurlan Ábdirov Polsha Respýblıkasyna jumys sapary aıasynda elektoraldyq protses máseleleri boıynsha halyqaralyq áriptestermen birqatar ekijaqty kezdesýler ótkizdi. Іs-sharalarǵa QR OSK Tóraǵasynyń orynbasary Muhtar Erman da qatysty.
QR OSK bastamasymen alǵash ret Eýropadaǵy qaýipsizdik jáne yntymaqtastyq uıymynyń (EQYU) Demokratııalyq ınstıtýttar jáne adam quqyqtary jónindegi bıýrosynyń (DIAQB) dırektory Marııa Telalıanmen kezdesý Varshava qalasyndaǵy EQYU DIAQB-nyń shtab-páterinde ótti.
Kezdesý barysynda QR OSK Tóraǵasy Nurlan Ábdirov Marııa Telalıandy jaqynda ǵana taǵaıyndalýymen quttyqtap, bul jaýapty qyzmetinde tabys tiledi.
Nurlan Ábdirov Qazaqstannyń EQYU DIAQB-men syndarly dıalogty dástúrli túrde joǵary baǵalaıtynyn jáne onyń baıqaý mıssııalarynyń qorytyndy usynymdaryna muqııat qaraıtynyn atap ótti.
— Biz Bıýro usynymdaryn QR OSK janyndaǵy Sarapshylyq keńeste azamattyq qoǵam ókilderiniń, onyń ishinde Jas saılaýshylar klýbynyń jáne Múgedektigi bar adamdardyń saılaý quqyqtary jónindegi jumys tobynyń qatysýymen júıeli túrde talqylaımyz, — dedi Nurlan Ábdirov.
Ortalyq saılaý komıssııasynyń Tóraǵasy EQYU DIAQB-men yntymaqtastyq Qazaqstanǵa basqa elderdegi saılaýlardy baıqaýǵa ǵana emes, sonymen qatar DIAQB-nyń uzaq jáne qysqa merzimdi mıssııalary aıasynda baıqaýshy retinde qatysýǵa múmkindik beretinin aıtty. Sonymen qatar, bul Qazaqstannyń halyqaralyq konferentsııalarǵa qatysýyna jol ashady jáne elektoraldyq ózgerister úderisinde belsendi bolýǵa múmkindik beredi.
Nurlan Ábdirov Prezıdent Q.K.Toqaevtyń bastamashylyq etken konstıtýtsııalyq reformalar aıasynda Qazaqstandaǵy saılaý júıesiniń transformatsııasy týraly keńinen baıandap, bul ózgerister qoǵam suranysyna negizdelgenin atap ótti. Bul transformatsııa EQYU DIAQB basshylyǵynyń qyzyǵýshylyǵyn týǵyzdy.
— Eń aldymen, bul sapardyń óte paıdaly bolǵanyn aıtýym kerek. Ol Qazaqstan Respýblıkasynyń Ortalyq saılaý komıssııasy saılaýdy baıqaý máseleleri boıynsha DIAQB-men syndarly dıalog júrgizýge shynymen de nıetti ekenin dáleldeıdi. Bul kezdesý bolashaqta da yntymaqtastyqty jalǵastyrýǵa daıyndyq bar ekenin aıqyn kórsetti. Biz mundaı ózara is-qımyldy damytý áleýetin kórip otyrmyz, - dedi EQYU DIAQB-nyń dırektory Marııa Telalıan.
Kezdesý barysynda taraptar saraptamalyq konsýltatsııalardy turaqty túrde ótkizýge nıetti ekenin rastady. Sonymen qatar saılaýdy uıymdastyrý, monıtorıng júrgizý tájirıbesi jáne Astanadaǵy EQYU baǵdarlamalar keńsesimen ózara is-qımyl máseleleri talqylandy.
Nurlan Ábdirov Polsha Respýblıkasynyń Ulttyq saılaý komıssııasynyń Tóraǵasy Sılvestr Marchınıakpen kezdesý ótkizdi.
Kezdesý barysynda QR OSK Tóraǵasy 2025 jylǵy 18 mamyrda ótken prezıdenttik saılaýdyń birinshi týrynyń sátti ótýimen áriptesin quttyqtady.
Kezdesý barysynda saılaý naýqandary kezindegi jalǵan aqparat pen dıpfeıkterge qarsy kúres taqyrybyna erekshe nazar aýdaryldy. Nurlan Ábdirov osy baǵyttaǵy tájirıbe almasýǵa múddelilik tanytyp, tsıfrlyq ortadaǵy zamanaýı qaýipterge qarsy tura alatyn turaqty tetikter qalyptastyrýdyń mańyzdylyǵyn atap ótti.
Taraptar elektoraldyq ózekti máseleler boıynsha saraptamalyq konsýltatsııalar ótkizýdi qosa alǵanda ekijaqty yntymaqtastyqty keńeıtý múmkindikterin talqylady.
Kezdesý sońynda qazaqstandyq delegatsııa polshalyq áriptesterine OSK ázirlegen ǵylymı basylymdardy, onyń ishinde aǵylshyn tilindegi «Qazaqstan Respýblıkasy Ortalyq saılaý komıssııasyna — 30 jyl. Qazaqstan Respýblıkasy saılaý júıesiniń transformatsııasy» atty monografııany jáne «Konstıtýtsııalyq reforma jáne saılaý júıesi» halyqaralyq konferentsııasynyń materıaldar jınaǵyn tabystady.
Sondaı-aq, Ortsaılaýkom Tóraǵasy Polshadaǵy prezıdenttik saılaýdy baıqaý boıynsha EQYU DIAQB mıssııasynyń baspasóz konferentsııasynyń jumysyna qatysty.
Aıta keteıik, QR Ortalyq saılaý komıssııasynyń tóraǵasy Nurlan Ábdirovtiń shaqyrýymen 12-16 mamyrda Saılaý organdary dúnıejúzilik qaýymdastyǵynyń (A-WEB) bas hatshysy In-shık Chjangtyń Qazaqstanǵa alǵashqy resmı sapary boldy.