Ortalyq Azııa men Qytaı qarym-qatynasy qaı baǵytta damymaq
TAShKENT. KAZINFORM – Ózbekstan astanasynda ekonomıkalyq jáne saıası taldaý ortalyqtarynyń «Ortalyq Azııa – Qytaı» IV forýmy ótti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Іs-sharaǵa Ortalyq Azııa elderi men Qytaıdyń saıası-ekonomıkalyq taldaý ortalyqtarynyń jetekshileri, dıplomattar jáne halyqaralyq sarapshylar qatysty.
Forým aıasynda saıasattanýshylar jáne ekonomıster Ortalyq Azııanyń 5 memleketi men Qytaı arasyndaǵy qaýipsizdik, tsıfrlyq ekonomıka, saıasat, ekologııa jáne gýmanıtarlyq máseleler boıynsha oılaryn ortaǵa salyp, pikir almasty.
«Qytaı – Qazaqstannyń mańyzdy syrtqy saıası seriktesi. Osy rette atalǵan memlekettiń bizge, bizdiń Qytaıǵa qatysty pozıtsııamyzdy anyqtap alý qajet. Úkimet qandaı da bir sheshimdi qabyldamas buryn, áýeli sarapshylarǵa júginedi. Tıisinshe, mamandar arnaıy taldaý júrgizip, bılikke usynys ázirleıdi. Sondyqtan bizdiń mindetimiz – eki el arasyndaǵy qarym-qatynastyń táýekelderi men múmkindikterin óz ýaqytynda anyqtap otyrý», - dep oıyn ortaǵa saldy Qazaqstannyń strategııalyq zertteýler ınstıtýty dırektorynyń orynbasary Asqar Nursha.
Búginde Ortalyq Azııa elderi óziniń jeke múddelerine saı máselelerin Qytaımen ekijaqty kezdesýlerde talqylap júr. Bul rette ózbekstandyq sarapshy Mýrat Bahadırovtiń paıymynsha, endi memleketter ortaq ustanymǵa uıyp, ózara ıntegratsııada jumys isteýi tıis.
«Qazir Ortalyq Azııa elderi men Qytaı qarym-qatynasynda bar múmkindikter men máselelerdi qarastyryp jatyrmyz. Osy dıalog alańyn paıdalana otyryp, túıtkilderdiń sheshý joldaryn izdestiremiz. Ol bizdiń bolashaq baılanysymyzdy nyǵaıta túsý úshin kerek. Qytaımen qarym-qatynas úshin bizge aımaq elderiniń ortaq pozıtsııasyn qalyptastyrý mańyzdy. Bul aldaǵy ýaqyttaǵy josparlardyń júıeli oryndalýyna negiz bolmaq», - dedi Ózbekstandaǵy Álemdik ekonomıka jáne dıplomatııa ýnıversıtetiniń kafedra dotsenti Mýrat Bahadırov.
Forým qorytyndysy boıynsha ár elden kelgen taldaý ortalyǵynyń mamandary óz úkimetteri úshin usynystar legin ázirlemek.
