«Ortalyq Azııa – Eýroodaq» alǵashqy sammıtine kimder qatysady

TAShKENT. KAZINFORM — «Ortalyq Azııa — Eýropalyq Odaq» sammıti 3-4 sáýir aralyǵynda Ózbekstannyń Samarqan qalasynda ótedi, dep habarlaıdy Kazinform agenttiginiń menshikti tilshisi. 

Alǵashqy sammıtke Ózbekstan prezıdenti Shavkat Mırzıeev tóraǵalyq etedi. Іs-sharaǵa Eýropalyq keńestiń prezıdenti Antonıý Koshta men Eýropalyq komıssııanyń prezıdenti Ýrsýla fon der Lıaıen qatysady. Sonymen qatar «Ortalyq Azııa — Eýroodaq» formatyndaǵy kezdesýge Memleket basshysy Qasym-Jomart Toqaev, Qyrǵyzstan, Tájikstan jáne Túrikmenstannyń prezıdentteri keledi.

Sammıt Ortalyq Azııa men Eýropalyq Odaq arasyndaǵy yntymaqtastyqty tereńdetý máselelerine arnalady. Onyń barysynda kólik-logıstıkalyq jobalardy birlesip qolǵa alý, strategııalyq shıkizat baǵytyndaǵy seriktestik, ekologııalyq taza jáne tıimdi energııa óndirý kózderin engizý múmkindikteri talqynalady.

— Biz shıelenis jaǵdaıynda ómir súrip jatyrmyz. Osy oraıda, Eýroodaq úshin jalǵyz sheshim — beıbitshilik pen ózara órkendeýge negizdelgen seriktestik ornatý. «Ortalyq Azııa — Eýroodaq» sammıti óńir elderi men eýroaımaq memleketteriniń ornyqty damýyna tirek bolatyn basty yntymaqtastyq baǵyttaryn aıqyndaıtyn alań bolmaq, — dep pikir bildirdi Eýropalyq keńestiń prezıdenti Antonıý Koshta sammıt qarsańynda.

Eske salaıyq, byltyr qyrkúıekte Shavkat Mırzıeev «Ortalyq Azııa — Eýroodaq» formatyndaǵy alǵashqy sammıtti Ózbekstanda ótizýdi usynǵan bolatyn.

Buǵan deıin Kazinform agenttigine suhbat bergen Ózbekstannyń burynǵy Syrtqy ister mınıstri Saıdmýhtor Saıdkasymov Ortalyq Azııanyń álemdik saıasattaǵy salmaǵy arta túskenin aıtyp edi.

Sonymen qatar sammıt qarsańynda Ózbekstandaǵy Ortalyq Azııa halyqaralyq ınstıtýtynda Eýropa men Ortalyq Azııadaǵy saıası taldaý ortalyqtarynyń forýmy ótti.