Ortalyq Azııa elderi bir-birine qoldaý kórsetýde ortaq ustanymnan aınyǵan emes – Memleket basshysy
ASTANA. KAZINFORM – «OA plıýs» formatyndaǵy jańa dıalog oryndarynyń paıda bolýy Ortalyq Azııanyń halyqaralyq saıasat sýbektisi retindegi saıası salmaǵy arta túskenin ańǵartady. Bul týraly QR Prezıdenti Qasym-Jomart Toqaevtyń «Egemen Qazaqstan» gazetinde «Ortalyq Azııa renessansy: ornyqty damý jáne órkendeý joly» taqyrybymen jarııalanǵan maqalasynda aıtylǵan.
«Ortalyq Azııa memleketteri men halyqtary geografııalyq ornyna baılanysty ǵasyrlar boıy birin-biri mádenı jaǵynan baıytýǵa jáne qurlyqta órkenıetaralyq dıalog ornatýǵa yqpal etti, beıbitshilik pen ózara túsinistikti saqtaý isine qomaqty úles qosty. Ortalyq Azııa qazir de osy izgi ári jaýapty mıssııasyn tabysty jalǵastyryp keledi. Bizdiń memleketterimiz Birikken Ulttar Uıymy Bas Assambleıasynyń mańyzdy qararlarynyń teń avtorlary atana otyryp, jahandyq ornyqty damý, jalpyǵa birdeı qaýipsizdik pen turaqtylyqty qamtamasyz etý, óńirlik jáne halyqaralyq qurylymdar aıasynda bir-birine qoldaý kórsetý sııaqty máseleler boıynsha ortaq ustanymnan aınyǵan emes», - delingen Memleket basshysy maqalasynda.
Prezıdenttiń jazýynsha, «OA plıýs» formatyndaǵy jańa dıalog oryndarynyń paıda bolýy Ortalyq Azııanyń halyqaralyq saıasat sýbektisi retindegi saıası salmaǵy arta túskenin ańǵartady. Osyǵan deıin mundaı formatta 9 sammıt jáne joǵary deńgeıdegi kezdesý ótti. Keıingi eki jylda «OA – RF» (Astana), «OA – QHR» (Sıan), «OA – AQSh» (Nıý-Iork), «OA – GFR» (Berlın) birinshi sammıtteri, OA jáne Eýropalyq Odaq memleketteri basshylarynyń eki kezdesýi (Astana, Sholpan-Ata), «OA – PShAMYK» (Jıdda) birinshi sammıti, sondaı-aq «OA – Úndistan» sammıti (onlaın formatta) ótkizildi. Bıyl Astanada alǵash ret «OA – Japonııa» sammıti ótedi.
«Osy formattaǵy ózara yqpaldastyqqa basqa da elder, halyqaralyq uıymdar qyzyǵýshylyq tanytyp otyrǵanyn atap ótken jón. Osylaısha, óńirdiń álemdik arena sýbektisi retindegi ornyn bekitýge mańyzdy qadam jasalyp jatyr. Jańǵyrtýǵa jáne ozyq bilimge umtylýmen qatar, dástúrli qundylyqtardy ustaný joly – Ortalyq Azııanyń damý baǵdary. Sóıtip, bizdiń aımaq jańaryp jatqan halyqaralyq júıeniń derbes ári yqpaldy múshesine aınalyp keledi. Búginde biz halyqaralyq geosaıası jáne geoekonomıkalyq ózgeristerdiń Eýrazııadaǵy ortalyǵy retindegi rólimizdi nyǵaıtýdy kózdep otyrmyz. Óńirdiń ekonomıkalyq salmaǵynyń arta túsýi, ınnovatsııalar úshin ashyq bolýy jáne zııatkerlik áleýeti onyń qazirgi zamanǵy álemdik qurylymnyń negizgi qozǵaýshy kúshteriniń birine aınalýyna múmkindik beretin alǵysharttardy qalyptastyrady. Bizdiń memleketterimizdiń buǵan qajetti barlyq resýrsy men múmkindigi bar. Syrtqy áriptesterimizben birlesip júrgizetin óńirlik jobalar aıasyndaǵy ortaq ustanymdarymyzdy dıalog alańdarynda jan-jaqty ilgeriletý úshin kúsh biriktirý máselesi erekshe nazar aýdarýǵa laıyq. Ortalyq Azııany Eýropa men Azııanyń arasyndaǵy kópir retinde ǵana emes, halyqaralyq qatynastar salasynda jahandyq deńgeıdegi jańa ortalyqqa aınalýǵa qabiletti jeke oıynshy retinde tanytatyn ýaqyt kelgenine senimdimin», - dedi Qasym-Jomart Toqaev.
