Orta derjavalardyń álemdik saıasattaǵy salmaǵy artyp keledi – reseılik sarapshy
ASTANA. KAZINFORM – Reseı Ǵylym akademııasynyń Álemdik ekonomıka jáne halyqaralyq qatynastar ınstıtýtynyń dırektory Fedor Voıtolovskıı osyndaı pikir bildirdi.
Aıta keteıik, Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýty (QSZI) men Reseı Ǵylym akademııasynyń Álemdik ekonomıka jáne halyqaralyq qatynastar ınstıtýty (RǴA ÁEHQI) saraptamalyq kezdesý ótkizgen bolatyn.
Іs-shara barysynda Qazaqstan men Reseıdiń eki jetekshi saraptamalyq ortalyqtary eki el arasyndaǵy yntymaqtastyqtyń damý dınamıkasyn talqylap, ekijaqty kún tártibiniń negizgi baǵyttary boıynsha sarapshylyq dıalogty tereńdetý qajettiligin atap ótti. Sonymen qatar, halyqaralyq jáne óńirlik qaýipsizdiktiń ózekti máseleleri boıynsha pikir almasty.
QR Prezıdenti janyndaǵy QSZI dırektory Erkin Tuqymov ekijaqty qarym-qatynastardyń oń dınamıkasyn jáne túrli deńgeıdegi kezdesýlerdiń turaqty sıpatyna nazar aýdardy. Onyń aıtýynsha, Qazaqstan men Reseı arasyndaǵy strategııalyq áriptestiktiń beriktigi – Eýrazııa keńistigindegi turaqtylyqtyń basty faktorlarynyń biri.
«Zamanaýı jaǵdaıda biz bir-birimizdiń múddelerimizdi eskerip, qurmetteýge erekshe nazar aýdarýymyz kerek. Teńdikke negizdelgen áriptestiktiń basty qaǵıdalary – ózara senim men ulttyq múddelerdi qurmetteý – jańa maǵynaǵa ıe bolýda», – dedi E. Tuqymov.
QSZI dırektory 2025 jyl eki el arasyndaǵy áriptestiktiń damýy úshin mańyzdy mereıtoı – Qazaqstan Respýblıkasy men Reseı Federatsııasy arasyndaǵy Qazaqstan-Reseı memlekettik shekarasy týraly shartqa 20 jyl tolatynyn eske saldy. Bul mereıtoıǵa elder turaqty saıası dıalogtyń arqasynda qalyptasqan tyǵyz ári nátıjeli yntymaqtastyqpen jetti.
E.Tuqymov Qazaqstan men Reseı arasyndaǵy strategııalyq qarym-qatynastardyń jańa kezeńinde saraptamalyq yntymaqtastyqtyń mańyzdy ról atqaratynyn atap ótti. Zııatkerlik dıplomatııa bul úderiste erekshe ról atqaryp, elderimiz arasyndaǵy yntymaqtastyqty nyǵaıtýǵa aıtarlyqtaı úles qosady.
RǴA ÁEHQI dırektory Fedor Voıtolovskıı óz sózinde halyqaralyq qatynastar júıesiniń transformatsııasy aıasynda «orta derjavalardyń» álemdik saıasatta salmaǵy artyp kele jatqanyn jáne Qazaqstan bul mártebede berik ornyqqanyn atap ótti.
Sondaı-aq, F.Voıtolovskıı QSZI men RǴA ÁEHQI arasyndaǵy jeke jáne ınstıtýtsıonaldyq deńgeıde qalyptasqan baılanys ekijaqty qatynastardyń ártúrli baǵyttaryn damytý tetigi retinde óziniń tıimdiligin dáleldegenine nazar aýdardy.
Taraptar saraptamalyq qaýymdastyqtyń keń aýqymdy ókilderin tarta otyryp, ıntellektýaldy yntymaqtastyqty odan ári damytýǵa múddeli ekendikterin rastady.
Osyǵan deıin Irıkla sý qoımasyn baqylaý boıynsha Qazaqstan-Reseı birlesken jumys toby qurylǵany týraly habarlaǵan bolatynbyz.