Órt sóndirýshiler Jańa jyl túni qalaı qyzmet atqarady
Aqtóbe qalasyndaǵy №4 órt sóndirý bólimi Jańa jyl túni kúsheıtilgen tártipte jumys istedi. Barlyǵy tórt eseptop jumysqa shyǵyp, qalanyń birneshe shaǵyn aýdanyndaǵy qaýipsizdikti baqylady. Kazinform tilshisi merekede jumys istegen órt sóndirýshilermen kezdesip keldi.
Jańa jylda eshkim úıine suranyp ketpeıdi - Aslan Qojageldın
Jańa jyl túni №4 órt sóndirý bólimi bastyǵynyń orynbasary Aslan Qojageldın kezekshilikke tústi. Ol jeke quramnyń jumysyn baqylap, qadaǵalap otyrdy. Barlyǵy 20-ǵa jýyq qyzmetker kezekshilik atqardy. Mundaǵy jumys 31 jeltoqsan kúni ǵana emes, balalardyń Jańa jyldyq erteńgilikteri kezinde de qarbalasqa toly boldy. Sebebi bekitilgen aýmaqta sport, mádenıet oshaqtary bar. Ondaǵy merekelik sharanyń bárinde órt sóndirýshiler baqylaý jumysyn júrgizedi.
- Bizdiń bólim Aqtóbe qalasyndaǵy Batys-2, 8-shaǵyn aýdan men Jańaqonysty, Ońtústik-batysty qaraıdy. Osy aýmaqqa jaýaptymyz. Ózim 2015 jyldan beri osy salada jumys istep júrmin. Aldymen júrgizýshi boldym. Keıin qaraýyl bastyǵyna kóterilip, qazir bólim bastyǵynyń orynbasary qyzmetin atqaryp júrmin. Negizi bala kúngi armanym dep te aıtýǵa bolady. Joǵary oqý ornynyń dıplomyn alǵan soń úsh aı kýrs oqyp, sertıfıkat alýǵa, ofıtser quramyna enýge múmkindik boldy. Sol múmkindikti qalt jibermedim, - dedi Aslan Qojageldın.
Órt sóndirýshiniń boıynan tabylýy tıis qasıettiń bárin boıǵa jıǵan maman úreı men qorqynyshty jeńý mańyzdy ekenin aıtyp berdi. Aldyńda kómek surap turǵan adamdy kórgende bári umytylyp, shuǵyl sheshim qabyldaıtyn qasıetke ıe qyzmetker qoǵamnyń da kózqarasy oń ekenin jasyrmaıdy. Bul da bolsa olarǵa úlken demeý.
- Qanshama órt bolyp, qyzmetkerlerimiz baqılyq bolyp ketip jatyr. Qazir qoǵamnyń pikiri jaqsy. Jaqsy qarsy alady, baǵalaıdy. Internette de jaqsy kommentarıı jazylyp jatady. Ol endi ózimizdiń jumysymyzdyń jemisi dep oılaımyn. Qanshama adam qutqaryldy, qar qursaýynan shyqty, sý tasqynynda aman qaldy, - dedi ol.
Órt sóndirýshilerdiń kún tártibi jazýdy. Olar sol talappen tańerteń kezekshilikti qabyldap alyp, qujattaryna, kıimderine tekserý júrgiziledi. Keıin teorııalyq biliktiligin arttyryp, tústen keıin qural-jabdyqtardyń jaraqtylyǵyn qaıta bir tekserip, ázirleıdi. Al shaqyrý bolsa, birden attanyp, jınalýyna 2-3 mınýt qana ýaqyt beriledi. Kelgen soń tehnıka jýylady, kıimderi keptiliredi. Teorııalyq sabaq ári qaraı jalǵasady.
- Jańa jylda jıi kezekshilikke túsemiz. Men jaýapty tulǵa bolyp tústim osy joly. Jaqyndarymdy Jańa jyl merekesi ótken soń quttyqtaımyn. On jyldaı qyzmet ettim. Sonyń bes jylyn Jańa jyldy bólimde qarsy aldym. Halyq toılap jatady. Biz kúsheıtilgen nusqada eńbek etemiz, qaýipsiz toılaýyna múmkindik jasaımyz. Al shaqyrtý bolmasa kishigirim dastarqan jaıyp, tilegimizdi aıtamyz. Túski asqa, keshki asqa jınalamyz. Suransa jibermeımiz. Otbasynda jaqyny kóz jumsa ǵana jiberiledi. Al merekege oraı bosatylmaıdy, - dedi Aslan Qojageldın.
Adam ómiri bárinen qymbat - Nurbol Abdıgapparov
Aqtóbe qalasy №4 órt sóndirý bóliminiń qaraýyl bastyǵy Nurbol Abdıgapparov bolsa buǵan deıin Hromtaý aýdanynda jumys istep, keıin oblys ortalyǵyna aýysqan. Ol qazirgi kezde 13 qyzmetkerine jaýapty. Aýysymdy qabyldap alǵan soń kún tártibi boıynsha órt taktıkasy, órt normatıvterin oqytady. Keıin praktıkalyq sabaqqa aýysyp, tústen keıin tehnıkaǵa kútim jasaıdy, tazalaıdy. Sonymen birge úlken nysandardyń, ǵırattardyń syzbasyn qarap, jattyǵady.
- Sheshýshi ýaqyttyń bes prıntsıpi bar. Kúndelikti sabaqta sony aıtamyz. Birinshiden, adam ómirin qutqarý. Ekinshiden, jarylystyń aldyn alý. Órtti sóndirmes burys osy ekeýin istemiz. Sodan keıin ǵana sóndirý jumystaryn júrgizemiz. Іshke kelgen soń paıdalanǵan qural-saımandy taza ustaımyz, kelesi shyǵý daıyndap qoıamyz. Ózim buǵan deıin Hromtaý aýdanynda jumys istedim. Boran kúni júkti áıel jedel járdem shaqyryp, jolǵa shyqqan. Sóıtip jolda qalyp qoıǵan. Biz shaqyrtýǵa trıkolmen shyqtyq. Júkti áıel kólikte bosandy. Ony aýdanǵa jetkizdik. Al qaladaǵy oqıǵaǵa keler bolsaq, Á.Moldaǵulova dańǵylyndaǵy úıdiń úshinshi qabatyn órt balkonynan bastap tarady. Sol kezde birinshi baryp, ratsııa arqyly qosymsha kómek suradym. Balalardy ishke kirgizdim, avtobaspaldaqpen qutqarý jumystaryn júrgizýge buıryq berdim. Sonymen birge Batys – 2 shaǵyn aýdanyndaǵy №14 úıde órt boldy. Qutqarý jumystaryn júrgizgende kózimdi jumyp júrgendeı boldym, eshteńe kórinbedi. Baspaldyqpen kóterilgende tunshyǵyp jatqan daýys estildi. Bala men áıel jerde jatty. Qazir áıeldi qutqarsam, bala shydamaı qalady dep oıladym. Eń birinshi balany alyp kettim. Sosyn baryp anasyn shyǵaryp, jedel járdemge tabystadyq. Keıin aman ekenin estidim, - dedi ol.
Nurbol Abdıgapparovtyń aıtýynsha, mańyzdysy adamdy dárigerler qolyna aman tapsyrý.
Balalarym maqtan etedi – Erjan Turtaev
№4 órt sóndirý bóliminiń bólimshe komandıri Erjan Turtaev bolsa on jyldan beri osy salada eńbek etedi. Negizgi mamandyǵy zańger. Bala kúngi armany qutqarýshy bolyp, adamdarǵa kómek kórsetý edi. Sóıtip qolǵa dıplom alǵan soń áskerge attandy. Kelgen soń birden órt sóndirý bólimine jumysqa ornalasty.
- Bizde ár shyǵýdyń ózi tájirıbe. Kúndelikti qyzmette túrli jaǵdaı bolady. Shuǵyl sheshim qabyldaıtyn da kez kezdesedi. Bir qaýipti shaqyrtý esimde. 2015 jyly bólim qaladaǵy Máskeý aýdanyna da jaýapty boldy. Tańǵy saǵat 5:00 shamasynda jer úıdiń órtengeni týraly habar tústi. Úı túgel janyp jatty. Kirý múmkindigi az boldy. Bizge jetken aqparat boıynsha eki adam ishinde qalǵan. Terezeden kirip, jer baýyrlap, bólmelerdi aralap shyqtyq. Denesi kúımegen, biraq ýanyp qalǵan qyzdyń múrdesin alyp shyqty. Ájesi de sol úıde qalǵan. Ony da qutqarý múmkin bolmady. Tań bolǵan soń kóbi uıyqtap jatady, habar kesh túsip qalǵan. Eń birinshi aýyr shaqyrtýdyń biri osy boldy, - dedi ol.
Úsh balanyń ákesi Jańa jyldy jumys ornynda qarsy aldy. Balalary bul kúni otbasy músheleriniń tórt kózi túgel bolǵanyn qalasa da asa jaýapty jumysty túsenedi.
- Olar órt sóndirýshi mamandyǵyn túsenedi. Demalys kúnderi ákelip kórsetemin, tanystyramyn. Bes jastaǵy balam bolsa balabaqshada maqtanyshpen aıtady, sýretterin salady. Jumystan saǵyna qarsy alady. Jańa jylda otbasy amandyǵyn tileımin, - dedi ol.
Jeke quramdy oqıǵa ornyna jetkizý mindetim - Azamat Amangeldi
Shaqyrtý túsken boıda qolyna qujat alyp, baǵytyn anyq biletin júrgizýshi Azamat Amangeldiniń bul qyzmetke ornalasqanyna bes jyl boldy. Onyń mindeti - jeke quramdy shaqyrtý ornyna jetkizý, sýdy úzdik berip turý. Qajet kezde kóligin ózi jóndep alyp, muntazdaı taza ustaıdy.
- Tańerteń kezekshilikke túskende qabyldap alamyz. Maı, sýyn tekseremiz, otaldyramyz. Ózim Q.Jubanov atyndaǵy Aqtóbe óńirlik ýnıversıtetin bitirdim. Negizgi mamandyǵym – bıolog-tehnolog. Bul jumysty dosymnan estidim. Ol osy salada jumys isteıdi. Áńgime barysynda qyzyqty jaıttardy aıtyp otyrady. Soǵan qyzyǵyp, men de keldim. Ókinbeımin. Áskerge baryp kelgen soń birden qujattarymdy tapsyrdym. Men ózim tehnıkaǵa jaqyn adammyn, bárin ákemnen úırengem. Sol úshin men osy baǵytty, júrgizýshilikti tańdadym. Kóshede arnaıy kólik júrgizýshisin syılaıdy. Tek keıde keptileske tap bolyp, jol bermeı jatady. Sonymen birge adamdar kólikti turaqqa durys qoımaı ketedi. Sondaı kezde qıyndaý bolady,- dedi Azamat Amangeldi.
Aıta keteıik, №4 órt sóndirý bóliminde 8 tehnıka bar. Barlyǵy 57 qyzmetker jumys isteıdi. Onyń úsheýi basshylyq qyzmet, tórteýi radıotelefonshy, tórteýi júrgizýshi, qalǵany órt sóndirýshi. Aýmaqqa qarasty 226 gıdrant bar. Jyl jyl túni Aqtóbe qalasynda shaqyrtý bolmady.
