Órt qaýipsizdigi: Osal topqa jatatyn otbasylarǵa 9 536 ýly gaz datchıgi ornatyldy
ASTANA. KAZINFORM — 15 tamyzdan bastap turǵyn úı sektorynda órttiń aldyn alýǵa jáne halyqtyń bilim deńgeıin arttyrýǵa baǵyttalǵan órt qaýipsizdigi aktsııasy ótkizilip keledi, dep habarlaıdy TJM baspasóz qyzmeti.
— TJM aýmaqtyq bólimsheleri áleýmettik jaǵynan osal toptarǵa jatatyn 108 442 turǵyn úıdi jáne 225 599 kópbalaly otbasyn esepke aldy. Búgingi tańda 112 969 úıde profılaktıkalyq jumys júrgizilip, onyń barysynda 289 387 azamatqa nusqaýlyq berildi. Úı-jaılardy aralaý barysynda 18 myńnan astam úı órt qaýipsizdigi talaptaryna saı keltirildi. Bıylǵy jyldyń 15 tamyzynan 3 qazanyna deıingi aralyqta turǵyn úılerge 9 536 datchık ornatyldy, — delingen vedomstvo habarlamasynda.
Óńirlerde turǵyn sektorda órtterdiń aldyn alý maqsatynda keshendi profılaktıkalyq is-sharalar júrgizilip jatyr. Bul is-sharanyń negizgi maqsaty — jylytý maýsymynda tótenshe jaǵdaılardyń aldyn alý jáne órt qaýipsizdigin qamtamasyz etý. Reıdter barysynda TJD qyzmetkerleri profılaktıkalyq áńgimeler júrgizip, nusqaýlyqtar ótkizip, jylytý júıelerin, elektr quraldaryn, gaz jabdyqtaryn qaýipsiz paıdalaný erejelerin jáne órt qaýipsizdigi talaptaryn túsindiredi.
TJD jergilikti atqarýshy organdarmen jáne volonterlik uıymdarmen birlesip, turǵyn sektorda profılaktıkalyq jumystardy kúsheıtti. Áleýmettik osal toptarǵa jatatyn azamattar men kópbalaly otbasylar turatyn úılerge erekshe nazar aýdarylady. Búgingi tańda 1000-nan astam úıge aralaý júrgizildi. Óńirde qosymsha qoldaýdy qajet etetin azamattar turatyn 3000-nan astam turǵyn úı jáne 1000-nan astam kópbalaly otbasy úıi esepke alynǵan. Azamattarǵa 100-den astam ýly gaz datchıgi ornatyldy. Sonymen qatar peshpen jylytý júıelerin jóndeýge, elektrmen jabdyqtaý júıelerin qalpyna keltirýge kómek kórsetilip, murjalar kúıeden tazartylyp jatyr.
Shyǵys Qazaqstan oblysy TJD qyzmetkerleri peshpen jylytylatyn, áleýmettik osal sanattaǵy azamattar turatyn turǵyn úılerdi aralap, órt qaýipsizdigi erejeleriniń saqtalýyn kózben sholyp tekserdi. 319 úıde 379 órt qaýipsizdigi buzýshylyǵy anyqtalyp, sonyń 185-i mamandardyń usynymdary arqyly sol jerde joıyldy. Tekserý barysynda úılerge ýly gaz datchıkteri ornatylyp, úılerdi órtke qarsy qaýipsiz jaǵdaıǵa keltirýge kómek kórsetilip keledi. Jalpy óńirde sońǵy jyldary shamamen 16 000 datchık ornatylyp, olardyń kómegimen 42 adamnyń ómiri qutqaryldy.
Batys Qazaqstan oblysy TJD qyzmetkerleri «QAZAQGAZ AIMAQ» AQ BQF mamandarymen, polıtsııa qyzmetkerlerimen, gaz-tehnıkalyq ınspektsııa ókilderimen jáne volonterlermen birlesip profılaktıkalyq is-sharalar ótkizdi. Turǵyn úılerdi aralaý barysynda anyqtalǵan órt qaýipsizdigi erejelerin buzý faktileri boıynsha azamattarǵa tıisti usynymdar berildi. Qyzmetkerler 13 myńnan astam turǵyn úıdi qamtyp, 260-tan astam ýly gaz datchıgin ornatty.
TJM azamattarǵa jylytý maýsymynda órt qaýipsizdigi erejelerin qatań saqtaý qajettigin eskertedi:
— tek jaramdy peshter men elektr quraldaryn qoldanyńyz;
— elektr jelilerin shamadan tys júktemeńiz;
— murjalardy ýaqytynda kúıeden tazartyńyz;
— jylytý júıeleriniń jaǵdaıyn únemi tekserip otyryńyz;
— balalardy eresekterdiń qaraýynsyz qaldyrmańyz;
— tutatqysh retinde janǵysh suıyqtyqtardy paıdalanbańyz.
Budan buryn ShQO-da elektr jelisiniń shamadan tys júktelýi saldarynan 150 ret órt shyqqanyn jazdyq.