Orman jáne dala órtteri qaýpi – mınıstrlik eskertý jasady

ASTANA. KAZINFORM – Tótenshe jaǵdaılar mınıstrligi elimizdiń birqatar óńirinde ystyq jáne qurǵaq aýa raıyna baılanysty órt qaýpiniń joǵary deńgeıi saqtalyp otyrǵanyn eskertti.

Qazirgi ýaqytta birneshe óńirde daýyldy eskertýler jarııalanyp, aldaǵy kúnderi órt qaýpiniń joǵary bolýy múmkindigi boljanýda. Osyǵan baılanysty TJM táýlik boıy órt jaǵdaıyn monıtorıngilep, orman alqaptary bar óńirlerde áýe kemeleriniń kezekshiligin uıymdastyrdy, ushqyshsyz ushý apparattaryn jumyldyrdy jáne órt kúzetterin qoıdy.

TJM azamattardy dala jáne orman alqaptarynda órt qaýipsizdigi erejelerin qatań saqtaýǵa shaqyrady: ot jaqpaýǵa, qoqys pen qurǵaq shópti órtemeýge, balalarǵa ot pen sirińkemen oınaýdyń qaýiptiligin túsindirýge keńes beredi.

Vedomstvo órt qaýipsizdigi talaptaryn buzǵany úshin ákimshilik jaýapkershilik qarastyrylǵanyn eske salady.

- Órtti nemese tútindi baıqaǵan jaǵdaıda 101 nemese 112 nómirine dereý habarlasý qajet, - delingen eskertýde.

Aıta keteıik, taýǵa baratyn týrıster TJM-ge onlaın habar bere alady.