Orynbor oblysyndaǵy Ireklı qoımasynan úlken kólemde sý jiberilmeýi múmkin

ATYRAÝ. KAZINFORM — Reseıdiń Orynbor oblysyndaǵy Irekti sý qoımasynan 10 naýryzdan beri sekýndyna 201 tekshe metr sý jiberilip jatyr. Alaıda aldaǵy ýaqytta úlken kólemde sý jiberilmeýi múmkin.

Kóktemgi sý tasqynyna baılanysty Atyraý jáne Orynbor oblystary arasynda áriptestik baılanys ornatýǵa qadam jasaldy. Bul másele Atyraý oblysy ákiminiń orynbasary Jasulan Bısembıev pen Orynbor oblysy gýbernatorynyń Ignat Petýhovtiń kezdesýinde qozǵaldy.

Kezdesý Orynbor oblysynda ótti.

Orynbor oblystyq gıdrometeorologııa ortalyǵynyń basshysy Vasılıı Meşerınniń málimetinshe, aldyn ala boljamǵa sáıkes qardyń qazirgi qory kópjylǵy ortasha mán deńgeıinen tómen ekeni anyqtalyp otyr. Alaıda ózenderde seń jyldaǵydan 6-12 kúnge erte júrýi múmkin. 

Orynbor oblysyndaǵy Tómengi Edil sý basseıni basqarmasy sý resýrstary bóliminiń jetekshisi Sergeı Rıdeldiń aıtýynsha, 10 naýryzda Ireklı sý qoımasynan jiberilgen sýdyń mólsheri sekýndyna 201 tekshe metrge deıin jetkizilgen.

— Sý qoımasynda 27 naýryzǵa deıin 1,2 mlrd tekshe metr oryn bosaıdy. Tasqyn kezinde 0,9-dan 1,5 mlrd tekshe metrge deıin sý keletinine boljam jasaldy. Sý qoımasynda bosaǵan oryn sý tasqynynyń qaýipsiz ótýine múmkindik beredi. Maksımaldy deńgeıde sý jiberýdiń qajettiligi týyndamaıdy, — deıdi Sergeı Rıdel.

Eske sala ketelik, buǵan deıin Atyraý oblysyndaǵy Oıyl jáne Jem ózenderinde sý tasý qaýpi baryn jazǵan edik.