«Ordabasy» fýtbol klýbynyń bas bapkeri taǵaıyndaldy
ASTANA. KAZINFORM — Moldovalyq maman Andreı Martın «Ordabasy» fýtbol klýbynyń bas bapkeri qyzmetine keldi.
Qazirge deıin bapker sol eldiń «Petrokýb» komandasynda tizginin ustady. 2023/2024 jylǵy maýsymda atalǵan ujymmen Moldova chempıonaty men Moldova Kýbogyn jeńip aldy. Komanda ÝEFA Konferentsııalar lıgasynyń toptyq kezeńinde oıyn kórsetti.
Moldovalyq maman 1974 jyldyń 27 maýsymynda dúnıege keldi. Fýtbolshylyq mansabynda qorǵaýshy, jartylaı qorǵaýshy shebinde oıyn kórsetken.
2008 jyldan beri bapkerlik qyzmetpen aınalysady. Eki jyl buryn «Petrokýb» klýbynyń tizginin ustady.
Aıta ketsek, budan buryn qazaqstandyq maman Kırıll Keker shymkenttik «Ordabasy» komandasynyń bas bapkeri qyzmetinen ketti.
K.Keker bul qyzmetke bıylǵy jyldyń tamyz aıynda kelgen edi.
Komanda el birinshiliginde tórtinshi oryndy mise tutty. Osyǵan baılanysty shymkenttik ujym sapynan kóptegen oıynshylar basqa komandalarǵa aýysty.