«Orda» tobynyń kontsertine jalǵan bılet satqan alaıaq ustaldy

ASTANA. KAZINFORM — Astanada kontsert bıletterin satýǵa baılanysty alaıaqtyq shemasy áshkerelendi, – dep habarlady Polisia.kz.

Elorda turǵyndary jalǵan kontsert bıletterin satyp alyp, alaıaqtardyń qurbany boldy. Jábirlenýshiler tanymal «Orda» tobynyń kontsertine kire almaı qalǵan sátte ǵana aldanǵanyn túsinip, birden polıtsııaǵa júgingen.

Sol sııaqty, basqa da azamattar reseılik tanymal ánshiniń keshine kirý úshin jalǵan QR kodtar satyp alǵan. Bıletterdiń quny 10 myńnan 20 myń teńgege deıin bolǵan. Al jalpy keltirilgen shyǵyn shamamen 200 myń teńge.

Jedel-izdestirý is-sharalary barysynda Almaty aýdanynyń krımınaldyq polıtsııa bóliminiń qyzmetkerleri bul alaıaqtyqqa 18 jastaǵy azamattyń qatysy bar ekenin anyqtady.

Kúdikti Instagram jelisinde jalǵan akkaýnt ashyp, tanymal ánshilerdiń kontsertterine barýǵa múmkindik beretin, shyn máninde joq bıletterdi usynǵan. Polıtsııa qyzmetkerleri jábirlenýshiler aqsha aýdarǵan banktik shotty tekserý arqyly kúdiktini taba aldy.

Tergeý barysynda jas jigit óz kinásin tolyq moıyndap, taǵy da 11 osyndaı alaıaqtyq áreket jasaǵany anyqtaldy.

Astana qalasynyń Polıtsııa departamenti azamattarǵa áleýmettik jelilerdegi jarnamalyq siltemeler arqyly bıletter satyp almaýdy eskertedi. Kez kelgen sharaǵa bılet alý úshin tekserilgen, resmı saıttardy paıdalaný qaýipsiz ekenin eske salady.

Jumysqa kirgizemin dep jurtty aldaǵan alaıaq Dýbaıdan elge jetkizilgenin jazǵan bolatynbyz.