Orazaqyn Asqar dúnıeden ozdy
Bul habardy QR Mádenıet jáne sport mınıstrligi rastady.
"Orazaqyn Asqar bir saǵat buryn Almatyda aýyr naýqastan qaıtys boldy. Aqynnyń jaqyndary men týystaryna kóńil aıtamyz. Marqumdy shyǵaryp salý men jerleý boıynsha keıinirek aqparat beremiz", - dep jaýap berdi QR Mádenıet jáne sport mınıstrliginiń baspasóz hatshysy Aıdar Qyryqbaı.
Orazaqyn Asqar 1935 jyly Qytaı Halyq Respýblıkasynyń Іle aımaǵynda dúnıege kelgen. Qulja qalasynda gımnazııany bitirip, Úrimshi qalasyndaǵy Ulttar ınstıtýtynyń til jáne ádebıet fakýltetine túsken. Qosymsha «Shyńjań gazeti» redaktsııasyna qyzmetke turǵan. 1955 jyly ata-mekeni Qazaqstanǵa kóship kelip, 1961 jyly Qazaq Memlekettik ýnıversıtetiniń fılologııa fakýltetin bitirip shyǵady.
Biraz jyl Qazaq KSR Ǵylym akademııasynyń Sh. Ýálıhanov atyndaǵy Tarıh, etnografııa jáne arheologııa ınstıtýtynda kishi ǵylymı qyzmetker, odan keıin Qazaqstan Jazýshylar odaǵynyń kórkem ádebıetti nasıhattaý bıýrosynda nusqaýshy, respýblıkalyq Kitap palatasynda bólim meńgerýshisi, «Jalyn» baspasynda aǵa redaktor bolǵan. Jyldar boıy qazaqtyń qara óleńin el ishinen jınap, eki tomyn bastyrdy. «Ádebı mura» baǵdarlamasyna oraı, «Álem balalar ádebıetiniń» qazaq tilindegi elý tomdyǵyn shyǵarý jumysyna atsalysty.
Qazaqstan Respýblıkasynyń Mádenıet jáne sport mınıstri Arystanbek Muhamedıuly aqyn, qoǵam qaıratkeri, Orazaqyn Asqardyń dúnıe salýyna oraı kóńil aıtty.
"Qazaqtyń mańdaıyna bitken dara tulǵa, kórnekti qalamger, ult janashyry Orazaqyn Asqar aǵamyz dúnıeden ozdy. Ulttyq ádebıetimizde óziniń qaıtalanbas qoltańbasyn qaldyrǵan talantty sýretker, qazaqtyń birtýar azamaty kelmes saparǵa attandy. Qazaq ádebıetiniń qaraly kúni barshańyzǵa qaıǵyryp kóńil aıtamyn. Alla aldyńyzdan jarylqasyn, aǵa! Janyńyz jánatta bolsyn", - dep jazdy mınıstr kóńil aıtý hatynda.
Foto: almaty-akshamy.kz
