Oraza ýaqyty: El óńirleri arasyndaǵy ýaqyt aıyrmashylyǵy qandaı

ASTANA. KAZINFORM — Qazaqstanda qasıetti Ramazan aıy bastaldy. El aýmaǵynyń keńdigine baılanysty oraza bastalý jáne aıaqtalý ýaqyty óńirlerde ártúrli. 

 Qazaqstanda qasıetti Ramazan aıy bastaldy. El aýmaǵynyń keńdigine baılanysty oraza bastalý jáne aıaqtalý ýaqyty óńirlerde ártúrli. Máselen, shyǵys aımaqtarda turǵyndar tańǵy sáresin iship, orazaǵa nıet etse, batys óńirde áli túngi ýaqyt saqtalady. Sol sııaqty aýyzashar ýaqytynda da aıtarlyqtaı aıyrmashylyq bar.

Kazinform tilshisi elimizdiń qaı óńirde sáresi erte bastalatynyn, aýyzashar qaıda keshirek bolatynyn jáne oraza ustaý uzaqtyǵy qansha saǵatqa sozylatynyn anyqtady.

Oraza ustaý ýaqyty: eń uzaq jáne eń qysqa kún

2026 jylǵy 20 aqpandaǵy málimet boıynsha, elimizde orazanyń ortasha uzaqtyǵy shamamen 12 saǵat. Degenmen ár óńirde bul kórsetkish ártúrli.

Eń uzaq oraza ustaý ýaqyty — Aqtaý qalasynda, 12 saǵat 7 mınýt. Almaty men Shymkent turǵyndary da osy ýaqyt aralyǵynda oraza ustaıdy (12 saǵat 7–9 mınýt).

Eń qysqa oraza — Petropavl (11 saǵat 50 mınýt) jáne Qostanaıda (11 saǵat 53 mınýt).

Túrkistan men Tarazda aýyzashar ýaqyty erterek belgilengendikten, oraza ustaý uzaqtyǵy 10–11 saǵat shamasynda kórsetiledi.

Sáresi qaıda erte bastalady?

Kún shyǵystan shyǵatyndyqtan, sáresin shyǵys óńirler bastaıdy. Sáresi — Óskemende tańǵy 05:02–de, Semeıde (05:12) jáne Taldyqorǵanda (05:19) bastalady.

Batys aımaqtarda sáresi eki saǵatqa kesh bastalady. Mysaly, Oral men Atyraýda turǵyndar sáresin shamamen 07:05–07:23 aralyǵynda aıaqtaıdy. Bul Qazaqstandaǵy ýaqyt aıyrmashylyǵynyń aıqyn kórinisi.

Aýyzashar ýaqyty qalaı ózgeredi?

Aýyzashar ýaqyty da óńirge baılanysty ózgerip otyrady.

Óskemendikter 17:01–de aýyz ashsa, Aqtaý turǵandary tek 19:15–te aýyz ashady.

Shyǵys pen batys arasyndaǵy aıyrmashylyq 2 saǵat 14 mınýt bolyp tur. Shyǵysta keshki asty iship jatqanda, batysta áli aýyzashar ýaqytyn biraz kútý qajet bolady.

Álemde oraza uzaqtyǵy qalaı ózgeredi?

Oraza ustaý uzaqtyǵy eldiń geografııalyq ornyna baılanysty ózgeredi. Qazaqstanda ol orta eseppen 12 saǵat bolsa, álemde 10–17 saǵat aralyǵynda bolady.

Soltústik elderde (Grenlandııa, Islandııa, Norvegııa, Shvetsııa) kún uzaq shyǵyp, kesh batatyndyqtan musylmandar 15–16 saǵat oraza ustaıdy.

Ońtústik jarty sharda (Chılı, Argentına, OAR, Jańa Zelandııa) kún qysqa bolǵandyqtan oraza 11,5–12 saǵatqa sozylady. 

Islam elderinde ýaqyt anaǵurlym turaqty. Mekke men Mádınada (Saýd Arabııasy) oraza shamamen 13 saǵatqa sozylady.

Túrkııada (Ystanbul) — 12,5–13 saǵat. Al ekvator mańyndaǵy Indonezııa men Malaızııada kún men tún uzaqtyǵy jyl boıy birdeı bolǵandyqtan, oraza turaqty túrde 13 saǵat 10–15 mınýtqa sozylady.

Aıta keteıik, buǵan deıin biz Orazada qalaı durys tamaqtaný kerektigi týraly jazǵan edik.