Oraza aıt kúnine oraı aqyly joldar tegin bolady – sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ózbekstannan Qazaqstanǵa 1,2 mln AQSh dollaryn jasyryn alyp ótpek bolǵandar ustaldy – ÓzA
Ózbekstannyń Memlekettik qaýipsizdik qyzmeti men keden organdary birlesip júrgizgen jedel is-shara barysynda Tashkent oblysy Tashkent aýdany aýmaǵyndaǵy «Naýaı» shekara-keden beketinde kórshi memleketke qaraı bet alǵan Lacetti kóligi toqtatylyp, kýágerlerdiń qatysýymen tekserilgen.
Kólik jolaýshysy retinde bara jatqan, Tashkent aýdanynda turatyn, 1978 jyly týǵan azamattyń qolyndaǵy paketinen 874 myń AQSh dollary tabylǵan. Bul týraly osy aptada «ÓzA» aqparat agenttigi habarlaǵan bolatyn.
Habarlamada aıtylýynsha, tekserý nátıjesinde, azamat bul iri kólemdegi valıýtany deklaratsııasyz, kedendik baqylaýdan jasyryp, Qazaqstanǵa alyp ótpek bolǵany anyqtaldy.
Sondaı-aq jedel shara barysynda tergeý jalǵasyp, Tashkent qalasyndaǵy bazarlarda saýdamen aınalysatyn azamattardan shetel valıýtasyn jınap, atalǵan áıelge tabystaǵan – Tashkent qalasynyń turǵyny, 1989 jyly týǵan azamattyń Tashkent aýdanyndaǵy ýaqytsha turyp jatqan úıi tekserilgen.
Nátıjesinde, aldaǵy ýaqytta Qazaqstanǵa alyp ótý úshin daıyndalǵan taǵy 399 170 AQSh dollary tabylǵan.
Jalpy 1 mıllıon 273 myń 170 AQSh dollary zattaı aıǵaq retinde tárkilengen.
Álemdegi alǵashqy teńiz astyndaǵy joǵary jyldamdyqty temirjol týnneli iske qosyldy – Halyq gazeti
Qytaıda jyldamdyǵy saǵatyna 350 shaqyrymdy quraıtyn álemdegi alǵashqy joǵary jyldamdyqtaǵy teńiz asty temirjol týnneli sátti aıaqtaldy. Bul týraly «Halyq gazeti» habarlady.
Qytaılyq BAQ-tyń málimetinshe, Shantoý-Shanveı joǵary jyldamdyqty temirjolynyń Shantoý shyǵanaǵyndaǵy qos jolaqty sý asty týnneliniń jalpy uzyndyǵy - 9 781 metr, al eń tereń bóligi teńiz deńgeıinen 98,5 metr tómende ornalasqan.
Shantoý-Shanveı joǵary jyldamdyqty temirjoly tolyqtaı paıdalanýǵa berilgennen keıin, ol kóptegen joǵary jyldamdyqty temirjoldarmen birge Qytaıdyń ońtústik-shyǵys jaǵalaýyndaǵy joǵary jyldamdyqty temirjol dálizine aınalady.
Jol Gýandýn, Fýtszıan jáne Chjetszıan ólkeleriniń 15 qalasyn baılanystyrady.
Iran óziniń ǵarysh baǵdarlamasynda qandaı jańa rekordtar ornatty – Parstoday
Iran ǵarysh uıymynyń basshysy hıjranyń 1403 jyly(2025 jyly) jańa ǵarysh rekordtarynyń ornatylýyna toqtalyp, ótken jyly orbıtaǵa bes spýtnık pen bir zertteý júk sátti shyǵarylǵanyn aıtqan. Bul týraly osy aptada Parstoday aqparat agenttigi habarlady.
Atalǵan aqparat agenttiginiń málimeti boıynsha, Iran ǵarysh uıymynyń basshysy Hasan Salarıe Mehr aqparat agenttigine bergen suhbatynda ótken jyly 3 jerserikti ushyrýda 6 ǵaryshtyq júktiń orbıtaǵa ornalastyrylǵanyn jarııalaǵan.
Onyń aıtýynsha, 1403 jyly(2025 jyly) «Chamran», «Kaýsar», «Hodhod» spýtnıkteri, orbıtalyq tasymaldaý blogy, «Fahr» jáne zertteý júkteri jiberilgen.
Irannyń ǵarysh uıymynyń basshysy bıylǵy jyly Irannyń ǵarysh salasynyń eń mańyzdy jetistikteri men tabystary týraly aıtqan.
Onyń keltirgen málimetterine súıensek, Iran ǵarysh ónerkásibinde ınfraqurylym salasynda aıtarlyqtaı ilgerileýshilikke qol jetkizgen, osylaısha Chabahar ǵarysh bazasy qazirgi ýaqytta 80 paıyzdan astam fızıkalyq ilgerileýge jetti jáne osy bazanyń birinshi kezeńi kelesi jyly resmı túrde ashylady dep kútilip otyr.
Irandyq BAQ-tyń dereginshe, 300 keli massany orbıtaǵa shyǵarý Irannyń ǵarysh salasy úshin rekordtyq kórsetkish bolyp tabylady
– Salarıe bylaı dep qosty: «Sımýrǵ» spýtnıktik tasymaldaýshysyna qatysty orbıtaǵa shamamen 300 keli massa ornalastyryldy, bul Irannyń ǵarysh salasy úshin rekordtyq kórsetkish. Sondaı-aq Irannyń ǵaryshtyq zertteýler ınstıtýty salǵan «Saman 1» orbıtalyq tasymaldaý blogy orbıtaǵa sátti engizilip, onyń kóptegen ishki júıeleri alǵash ret orbıtada sátti synaqtan ótti, - dep jazdy ParsToday.
Oraza aıt kúni aqyly joldar tegin bolady – Jenmın jıbao
Oraza aıt kúni Shyńjańdaǵy shaǵyn jolaýshylar avtokóligine deıingi barlyq jeńil avtokólikterden aqyly joldarda tolyqtaı jeńildik jasalady. Bul týraly Qytaıdyń Jenmın jıbao aqparattyq portaly habarlady.
Shyńjań uıǵyr avtonomııaly ólkelik halyq úkimetiniń resmı saıty jarııalaǵan 2025 jylǵy mereke, meıram kúnderindegi demalys málimdemesine negizdelsek, kelesi keletin zańda belgilengen mereke kúni retinde Oraza aıt merekesi (31 naýryz kúni) bolyp, 29 naýryzdan (senbi) 31 naýryz kúnine (dúısenbi) deıin jalpy 3 kún demalys beriledi
Shyńjań Qatynas-tasymal qarjy qosý toby vıchat áleýmettik jelisinde jarııalaǵan oraza aıtta saparǵa shyǵýǵa qyzmet óteý baǵdarnamasyna negizdelgende, oraza aıt merekesi kúni Shyńjańda aqy alynatyn jolda 7 adamdyqtan tómen (7 adamdyqty qamtıdy) shaǵyn jolaýshylar avtokóliginen aqy alynbaıdy. Aqyly joldardaǵy jeńildik ýaqyty 31 naýryz kúni saǵat 00:00-den sol kúngi saǵat 24:00 ke deıin bolady.
Aıta keteıik, Qytaıda Oraza aıt merekesi 31 naýryz atap ótiledi.
Oraza aıt pen Chıńmıń merekesinde jolaýshylar poıyzy kóbeıedi – CNR
Oraza aıt pen Chıńmıń merekesi demalysyna taıap qaldy. Munyń ishinde oraza aıt demalysynda temir joldyń mereke demalysy kezindegi tasymal ýaqyty 28 naýryzdan 1 sáýir kúnine deıin jıyny 5 kún bolyp, shamamen 632 myń adam jolaýshy tasymaldanady. Bul týraly Qytaıdyń «Ortalyq halyq radıosy» aqparat agenttigi habarlady.
Atalǵan BAQ-tyń keltirgen deregine súıensek, sonymen qatar Qytaıdyń Chıńmıń merekesi demalysynda temir joldyń mereke demalysy kezindegi tasymal ýaqyty 3 sáýirden 7 sáýir kúnine deıin jıyny 5 kún bolady. Osy ýaqytta shamamen 761 myń 100 jolaýshy jóneltilip, byltyrǵy osy merekedegi ýaqytpen salystyrǵan 4.9%-ǵa artady. Sondyqtan Shyńjań temir jol salasynyń mamandary ýaqyttyq jolaýshylar poıyzynan 297 kezekshi poıyzdy kóbeıtip, jolaýshylardyń demalys kezindegi sapar qajetin tolyq qanaǵattandyrýdy josparlap otyr.
Túrkııanyń «Kitap aýrýhanasy»: Sırek qoljazbalar qaıta jańǵyrtylyp otyr – TRT
Stambýldaǵy tarıhı Ramı kitaphanasynyń «Shıfahana» bóliminde mamandar ǵasyrlar boıy saqtalyp kelgen sırek qoljazbalardy muqııat qalpyna keltirip, bul baǵa jetpes jádigerlerge jańa ómir syılap jatyr. Bul týraly osy aptada Túrkııa Radıo Televızııa portaly habarlady.
«TRT»-nyń dereginshe, XVIII ǵasyrdan qalǵan buryn áskerı kazarma retinde paıdalanylǵan tarıhı ǵımaratta ornalasqan Ramı kitaphanasy 2023 jyly ashyldy.
Kitaphana quramyndaǵy «Shıfahana» atty restavratsııa ortalyǵy Túrkııa jazba jádigerler mekemesine qarasty jumys isteıdi.
«Kitap aýrýhanasy» dep te atalatyn Shıfahanada Osmanly túrikshesi, arab, parsy, ıvrıt jáne orys tilderinde jazylǵan myńjyldyq tarıhy bar sırek qoljazbalar qalpyna keltiriledi.
Sonymen qatar Lıvan sııaqty elderden de restavratsııaǵa arnalǵan shyǵarmalar qabyldanady.
Shıfahananyń jetekshisi doktor Nıl Baıdardyń aıtýynsha, qalpyna keltirý protsesi hırýrgııalyq operatsııaǵa uqsaıdy. Qoljazbanyń saýlyǵy – basty másele. Sondyqtan eńbekterge zııan keltirmeı, halyqaralyq standarttarǵa saı jumys isteledi.