Oraz Táýirbekov Qaraǵandy oblysy ákiminiń orynbasary qyzmetine taǵaıyndaldy

QARAǴANDY. KAZINFORM - Qaraǵandy oblysy ákiminiń orynbasary laýazymyna Temirtaýdyń burynǵy ákimi Oraz Táýirbekov taǵaıyndaldy.

Kadrlyq ózgeris týraly aımaq basshysy Ermaǵanbet Bólekpaev apparattyq keńeste málim etti, dep habarlaıdy Kazinform tilshisi.

- Erlan Qusaıyn basqa jumysqa taǵaıyndalýyna baılanysty atqaratyn qyzmetinen bosatyldy. QR Prezıdenti Ákimshiliginiń kelisimi boıynsha Táýirbekov Oraz Qaısaıuly oblys ákiminiń orynbasary bolyp taǵaıyndaldy, - dedi Ermaǵanbet Bólekpaev.

Oraz Táýirbekov ákimniń orynbasary laýazymynda densaýlyq saqtaý, jumyspen qamtý jáne eńbek qaýipsizdigi máselelerine jetekshilik etetin bolady.

Oraz Táýirbekov salyq qyzmetinde jumys istep, salyq ınspektory qyzmetinen birneshe óńirdegi oblystyq basqarmalardyń basshysyna deıingi joldan ótti. Sondaı-aq, kommertsııa salasyndaǵy basshylyq laýazymdarda jumys tájirıbesi bar.

Jeti jyl Qaraǵandy oblysynyń Tekserý komıssııasynyń múshesi bolyp jumys istedi.

Oraz Táýirbekov Qaraǵandy oblysynyń ekonomıka jáne bıýdjettik josparlaý basqarmasyn, qaıta qurylǵannan keıin – «Qaraǵandy oblysynyń ekonomıka basqarmasy» MM basqardy. Balqash qalasynyń ákimi bolǵan. 2022 jyldyń qyrkúıeginen bastap osy taǵaıyndaýǵa deıin Temirtaý qalasynyń ákimi qyzmetin atqardy.