Oralda jol jóndeý kezinde kemshilikter anyqtaldy
ORAL. KAZINFORM – Oral qalasyna qarasty Zachagan kentinde jol jóndeý kezinde merdiger tarapynan kemshilikterge jol berilgen.

BQO qoǵamdyq keńesiniń múshesi, zańger Baýyrjan Ahmetjannyń Facebook áleýmettik jelisindegi paraqshasynda málim etkenindeı, atalmysh kentte bas-aıaǵy 38 kóshe asfalttanady. Merdiger bul jumysty 1,2 mlrd teńgege atqarady.
Onyń sózine qaraǵanda, ótken jyldyń 30 mamyrynda Zachagan kentiniń ákimi Aqqalı Áýbekerov pen «Aıdana» JShS dırektory Armen Amırhanıan arasynda kelisim-shartqa qol qoıylǵan.
Joba quny — 1 mlrd 199 mln 923,580 myń teńge. 38 kóshege nemese 24 shaqyrymǵa tas jabynmen qaptaý tásilimen (ANT) jol salý josparlanǵan.

— Kúni búginge deıin 17 kóshege nemese 12 shaqyrymǵa jol tóselip, merdigerge 689,2 mln teńge tólengen. Budan buryn «Jol aktıvteriniń ulttyq sapa ortalyǵy» RMK BQO fılıaly mamandary júrgizgen tekseris kezinde asfalttyń jarylýy, bıtýmnyń jol betine shyǵýy, jabynnyń otyrýy, buzylýy, úgilýi, syzyq túsý, asfaltty durys taptamaý, keıbir ýchaskelerdegi asfalt qalyńdyǵynyń kemdigi sııaqty kemshilikter anyqtalǵan eken. Jol salynyp jatqan «Sarytaý» shaǵynaýdany turǵyndarynan aryz túskennen keıin mamandarmen birge qoǵamdyq baqylaý júrgizdik. Sonyń barysynda alynǵan kernniń mólsheri normaǵa saı boldy, — deıdi B.Ahmetjan.
«Jol aktıvteriniń ulttyq sapa ortalyǵy» RMK BQO fılıalynyń bólim basshysy Dáýren Ámirovtiń naqtylaýynsha, ortalyq qyzmetkerleri jol salý kezindegi jumystar men materıaldardyń sapasyna iriktemeli saraptama jasaý maqsatynda Zachagan kentindegi aǵymdaǵy jóndeý nysanyna 10 ret tekseris júrgizdi.

— Sonyń barysynda 10 aqaý anyqtaldy. Atap aıtqanda, tehnologııalyq talaptar saqtalmaǵan, jol jabyndysynyń joba boıynsha geometrııalyq parametrlerinen aýytqýy jáne basqa kemshilikter baıqaldy. Oǵan qosa 15 jol-qurylys materıaly zerthanamyzda synaldy. Sonyń ishinde bireýi (asfaltbeton qospasynyń granýlometrııalyq quramy, fızıkalyq jáne mehanıkalyq sıpattary) normatıvtik qujattamalarǵa saı bolmaı shyqty, — dedi bólim basshysy.
Mamannyń túsindirýinshe, jol qurylysynda ortaq problemalar bar. Mysaly, tapsyrys berýshi tarapynan jumystar men materıaldardyń sapasyn saraptaýda qarjy az kólemde bólinedi, ol joba qunynyń bir paıyzyna da jetpeıdi.
Merdiger uıymdardyń júktemesine kelsek, bir kompanııaǵa 7-10 jobadan keledi, sonyń saldarynan tehnıkanyń jetispeýshiligi baıqalady.
Kesteniń merzimi saqtalmaı, qurylys-montaj jumystary kúzge deıin sozylady.

— Merdiger uıymdardyń kópshiliginde asfaltbeton zaýyty joq. Sondaı-aq jol zerthanalary qurylys nysanynda bolmaǵandyqtan, asfalt tóseý tehnologııasy (temperatýra) buzylady. Merdiger uıymdardyń kópshiligi jańadan jóndelgen ýchaskelerdi buza otyryp, aýyr júk tehnıkalaryn qoldanady. Tehnıkalyq qadaǵalaý mamanyn bir jobaǵa bekitý júıesi joq. Tehnıkalyq qadaǵalaý mamany bir mezgilde birneshe jobaǵa bekitiletindikten, tıisti baqylaý da bolmaı jatady, — dedi D.Ámirov.
Zachagan kenti ákiminiń orynbasary Asyljan Haırýllınniń habarlaýynsha, qazirgi tańda 38 kósheniń 25-ine asfalt tóselgen.
— ANT tásilimen kentimizdiń tek qysqa, qoǵamdyq kólik qatynamaıtyn, júk kólikteri júrmeıtin júrmeıtin kóshelerine jol salynýda. Jumys barysynda paıda bolǵan kemshilikter jáne talapqa saı kelmeıtin jumystar tolyq joıylyp, «Jol aktıvteriniń ulttyq sapa ortalyǵy» mamandary qaıtadan tekserip, qabyldap alady. Sonymen qatar merdiger kelisimshartqa sáıkes salynǵan joldarǵa úsh jylǵa kepildik beredi. Jalpy, kenttegi 170 kósheniń 79-ynda asfalt jabyndysy joq. Basqa magıstraldi, kólik qozǵalysy kóp kóshelerge arnaıy jobalyq-smetalyq qujattama daıyndalyp, jumystar júrgiziledi, — dedi A.Haırýllın.

Zachagan kentindegi Gúlzar kóshesiniń turǵyny Renat Fedıanın jol qurylysyna alańdaıtynyn bildirdi.
— Bizdiń kóshe turǵyndary otyz jyldan astam ýaqyt boıy jol azabyn tartyp keledi. Bıyl 38 kósheniń qataryna engenine shúkirlik etemiz. Asfalt salamyz dep joldy qyrý jumystary bastaldy. Endi tek sozylyp ketpeı, joldyń sapaly salynǵanyn qalaımyz, — dedi R. Fedıanın.

Eske sala keteıik, budan buryn Batys Qazaqstanda jańbyrly kúni jolǵa asfalt tóselgenin jazǵan edik.