Oralda jazýshy, qoǵam qaıratkeri Engels Ǵabbasovty eske aldy

ORAL. QazAqparat - Oral qalasynda belgili qalamger, Qazaqstan Jazýshylar odaǵynyń múshesi, Qazaqstannyń eńbek sińirgen qaıratkeri Engels Ǵabbasovty eske alýǵa arnalǵan «Eńbegi eren jan edi...» atty eske alý keshi ótti, dep habarlaıdy «QazAqparat» tilshisi.

Aqyn, Qazaqstan Jazýshylar odaǵy BQO bólimshesiniń tóraıymy, halyqaralyq «Alash» ádebı syılyǵynyń laýreaty Aqushtap Baqtygereeva Jalpaqtaldan shyqqan jazýshy Engels Ǵabbasovtyń ádebıet pen qoǵamǵa qosqan úlesi, shyǵarmalarynyń ereksheligi, kisilik qadir-qasıeti týraly sóz qozǵady. Sondaı-aq BQO ardagerler keńesiniń tóraǵasy Myrzaǵalı Muhambetov, bilim jáne ǵylym qyzmetkerleri kásipodaǵy oblystyq uıymynyń tóraǵasy Marat Daýpaev, jazýshynyń qaryndasy, J.Dosmuhamedov atyndaǵy pedkolledj dırektorynyń orynbasary Sholpan Nábıdýllına jáne basqalar estelikterimen bólisti.

1937 jyly Qaztalov aýdanynda dúnıege kelgen Engels Ǵabbasov Oral pedagogıkalyq ınstıtýtynyń orys tili men ádebıeti bólimin bitirgennen keıin  ustazdyq etti. Partııa jáne qoǵamdyq uıymdarda qyzmet etti. Shyǵarmalaryn orys tilinde jazǵan qalamger Odaqqa da tanymal boldy. Batys Qazaqstan oblysy aýmaǵyndaǵy áskerı synaq polıgondaryn jabý jáne basqa ótkir máseleler jóninde ún qatyp, aýa raıyn boljaýǵa deıin óziniń oı-pikir, usynystarymen bólisip otyrdy. Laýazymdyq qyzmetter atqarýmen birge fılologııa ǵylymdarynyń kandıdaty, dotsent retinde joǵary oqý oryndarynda dáris bergen E.Ǵabbasov ótken ǵasyrdyń toqsanynshy jyldary halyq qalaýlysy atanyp, QR Parlamenti Senatynyń depýtaty bolyp saılandy. Prezıdenttik dodaǵa da túsip kórdi. Elbasy Nursultan Nazarbaev el ómirine etene aralasqan onyń qoǵam qaıratkeri retindegi eńbegin joǵary baǵalap,  kezinde óziniń saǵatyn syıǵa tartty. Qazir mýzeıde turǵan saǵatty tarıhshy-ustaz Saılaý Súleımenov keshke qatysýshylarǵa ákelip, kórsetti.

Batysqazaqstandyqtar bıyl týǵanyna 80 jyl tolǵan qalamger ári qaıratkerdi osylaısha eske aldy.