Oralda Jaıyq ózeniniń sý deńgeıi tómendep keledi – Nurdildá Oraz

ORAL. KAZINFORM - Osy saǵatta Jaıyq ózeniniń sý deńgeıi 844 boldy, al qaýipti deńgeı – 850 sm. Osydan 5 kún buryn, 22-23 sáýirde bul kórsetkish qaýipti deńgeıden asyp, 864 sm bolǵan. Bul týraly Batys Qazaqstan oblysy ákimi apparatynyń basshysy Nurdildá Oraz OKQ alańynda ótken brıfıngte málimdedi.

«Jumyldyrylǵan kúshter men tehnıkalar úsh apta boıy atqarǵan jumystar óz nátıjesin berdi. Óńirlerden 1000 jýyq arnaıy tehnıka, 2000 astam sarbaz kelgen bolatyn. Oral qalasynyń ózinde 45 km bóget salyndy, oblys boıynsha jalpy 150 km damby salyndy. Sonyń arqasynda Aqjaıyq aýdanynda sý turaqtalyp jatsa, Jaıyq ózeniniń Oraldaǵy deńgeıi kúnnen-kúnge 2-4 sm tómendep keledi», - dedi spıker.

Keshendi jumystardyń nátıjesinde qaýip tóngen 84 eldi mekenniń birde-bireýin sý basqan joq. Tek saıajaı ýchaskeleri ǵana sý astynda qaldy.

Oral qalasyndaǵy bógetter erekshe baqylaýǵa alynǵan, adamdar sýdyń eldi mekenderge ótýin qadaǵalap jatyr.

Buǵan deıin Jaıyq ózeniniń deńgeıi Taıpaq aýylynda 25 santımetrge kóterilgenin jazǵan bolatynbyz.