Oralda jańa emhana salý qajettigi týyndady
ORAL. KAZINFORM — Oral qalasyna qarasty Zachagan kentinde № 6 emhana turǵyndardy qabyldaý úshin jetkiliksiz bolyp otyr.
Atalmysh emhana dırektory Jumabek Shaıhıevtiń málim etkenindeı, medıtsınalyq mekemege bekitilgen turǵyndar sany 80 myńnan asyp ketken.
Onyń sózine qaraǵanda, 2014 jyly salynǵan qos qabatty ǵımarat kúnine 250 adamdy ǵana qabyldaýǵa eseptelgen.
— Shyn mánisinde emhana kúnine shamamen myń adamǵa qyzmet kórsetedi. Qazirgi tańda emhana taǵy eki ǵımaratty jalǵa alyp otyr. Jalǵa alý aqysyn ózimiz tóleımiz. Bul birneshe jyl boıy jalǵasyp keledi. Qarjynyń tapshylyǵynan qyzmetkerlerimizge merekede syıaqy tóleı almaımyz. Sondyqtan Zachagan kentinde jańa emhana salý qajet. Oǵan qosa «Aqjaıyq» shaǵynaýdanyndaǵy jańa úılerge qonystanýshylar kóbeıip otyr. Sondyqtan emdelýshiler sany da ósýde, — dedi J.Shaıhıev.
BQO qurylys basqarmasynyń basshysy Nurken Moldashevtyń naqtylaýynsha, jańa emhananyń jobalyq-smetalyq qujattamasy jasalǵan.
— Densaýlyq saqtaý mınıstrligine bıýdjettik ótinim berildi. Respýblıkalyq bıýdjetten qoldaý tapqannan keıin 250 kelýshige arnalǵan emhanany «Aqjaıyq» shaǵynaýdanynda salý kózdelip otyr. Quny — 4,8 mlrd teńge. Jobada emhanany medıtsınalyq qural-jabdyqtarmen qamtý da qarastyrylǵan, — dedi N.Moldashev.
Zachagan kentiniń ákimi Aqqalı Áýbekerov jańa emhana qajettigin jetkizdi.
— № 6 qalalyq emhanaǵa Krýgloozernyı, Serebrıakov kentteriniń turǵyndary da qaralady. Sol sebepti medıtsınalyq mekemege júginýshiler sany kóbeıip, ǵımarattyń tarlyǵy yńǵaısyzdyq týǵyzyp otyr, — dedi A.Áýbekerov.
Zachagan kentiniń turǵyny Gúljan Jumaǵalıeva emdelýshiler úshin barlyǵy bir ǵımaratta bolǵany yńǵaıly ekenin aıtady.
— Qazirgi kezde bizder № 6 emhananyń ózinde emes, № 20 mektep aýdanynda ornalasqan № 5 otbasylyq densaýlyq ortalyǵyna baryp qaralyp júrmiz. Barǵan kezde dárigerler men medbıkeler aýysyp jatady. Aldyn ala jazylǵanmen, kezekke tap bolasyń. Basqalaı qolaısyzdyqtar da bar. Eger bári bir jerde uıymdastyrylyp, qyzmetkerler turaqtalsa, turǵyndar úshin de jaqsy bolar edi, — dedi G.Jumaǵalıeva.
Eske sala keteıik, budan buryn BQO-da densaýlyq saqtaý salasynda 180 maman jetispeıtinin jazǵan edik.