Oralda úshem bosanǵan kópbalaly ana perzenthanadan shyqty
ORAL. KAZINFORM – Oral qalasynyń turǵyny Aızada Qubasheva dúnıege úshemdi alyp keldi.
Óziniń aıtýynsha, úshem 6 naýryz kúni saǵat 09.50, 09.51, 09.55-te jaryq dúnıege kóringen. Salmaqtary — 2 020, 2 100 jáne 2 360 gramm.
— Esimderin Medına, Raıana, Aıala dep qoıdyq. Ózim Álııa Moldaǵulova atyndaǵy № 38 mektep-lıtseıinde muǵalim bolyp jumys isteımin. Otaǵasymyz Meırambek Maǵzomov — shaǵyn jeke kásipker. Osyǵan deıin Maqsat, Ernur, Jáńgir atty úsh ulymyz bar edi. Úlkeni 12-de, ortanshysy 9-da, kishisi 6 jasta. Endi, mine, soǵan úsh qyzymyz qosylyp, kópbalaly ana atanyp otyrmyn. Ózimiz ata-enemizben birge turamyz, jeke úıimiz joq, - deıdi Kazinform tilshisine bergen suhbatynda A.Qubasheva.
Aızadanyń sózine qaraǵanda, ol barlyq balasyn kesar tiligi arqyly bosanǵan.
— Oblystyq perınataldyq ortalyq ujymyna rızashylyǵym sheksiz. Josparly túrde júktiliktiń 35 aptasynda bosandyryp aldy. Alfııa Qajymuratqyzy, Saltanat Ǵalymjanqyzy syndy dárigerlerdiń biliktiligi arqasynda kesar tiligi sátti ótti. Sondaı-aq qyzdarymdy kúni-túni qaraǵan jansaqtaý bóliminiń dárigerleri men meıirbıkelerine shyn júrekten alǵysymdy aıtamyn. Mine, búgin Naýryz merekesi qarsańynda perzenthanadan aman-esen shyǵyp jatqanymyzǵa qýanyshtymyn. Onyń ústine búgin — týǵan kúnim, 35 jasqa tolyp jatyrmyn, - dedi kópbalaly ana.
BQO densaýlyq saqtaý basqarmasy baspasóz qyzmetiniń naqtylaýynsha, sábıler eki apta boıy jańa týǵan náresteler patologııasy bólimi dárigerleriniń baqylaýynda boldy. Qazirgi tańda olardyń jaǵdaıy qanaǵattanarlyq.
Eske sala keteıik, budan buryn Batys Qazaqstanda úshem dúnıege kelgenin jazǵan bolatynbyz.