Oralda Ýnıversıadaǵa qatysýshylardy qoldaý maqsatynda shańǵy joryǵy uıymdastyryldy
Qalalyq mádenıet jáne demalys saıabaǵynan bastalǵan kópshilik júgirý sharasyna shahardaǵy mekeme-uıymdar qyzmetkerleri, turǵyndar belsendi qatysty. «Dınamo» sport bazasy mańynda márege jetken shara sońynda lotereıa oınatyldy. Sharaǵa qatysqan oblys ákiminiń orynbasary Marat Toqjanov Ýnıversıadaǵa baratyn qazaqstandyq sportshylardyń jeńis tuǵyrynan kórinýine batysqazaqstandyqtardyń tilektes ekendigin jetkizdi. 
Qalalyq dene shynyqtyrý jáne sport bóliminiń basshysy Azamat Nurmuhanbetovtiń aıtýynsha, shańǵy sekildi qysqy sport túrlerin damytýǵa osyndaı kópshilik sharalar da septesedi. Oralda 28-inshi dúnıejúzilik qysqy Ýnıversıada alaýy estafetasy 27 qańtar kúni ótkiziledi. M.Ótemisov atyndaǵy Batys Qazaqstan memlekettik ýnıversıtetinen bastaý alatyn shara tennıs ortalyǵynda márege jetedi. Alaýgerler tizimi jasalyp, ázirlik aıaqtala keldi. Shara barysynda oblys ártisteriniń qatysýymen kontsert te qoıylady.
Eske sala keteıik, Ýnıversıadaǵa short-trekten Qazaqstan ulttyq quramasynyń bas jattyqtyrýshysy Mádiǵalı Qarsybekov bastaǵan mamandar baptaıtyn komanda sapynda Batys Qazaqstan oblysynan Abzal Ájiǵalıev, Nurbergen Jumaǵazıev, Aıdar Bekjanov, Nurtilek Qajyǵalı jáne Anıta Nagaı qatysady.
