Oralda Uly Otan soǵysy týraly kitaptyń tanystyrylymy boldy

ORAL. QazAqparat - J.Moldaǵalıev atyndaǵy oblystyq ǵylymı-ámbebap kitaphanasynda BQO ákimdiginiń qoldaýymen Almatydaǵy «Zolotaıa knıga» baspasynan jaryq kórgen «Qazaqstan Uly Otan soǵysy jyldarynda. Batys Qazaqstan oblysy» atty jańa kitaptyń tanystyrylymy boldy, dep habarlaıdy «QazAqparat» HAA tilshisi.

Sharaǵa qatysqan BQO mádenıet, muraǵattar jáne qujattama basqarmasynyń basshysy Dáýletkereı Qusaıynovtyń atap ótkenindeı, Uly Otan soǵysynyń aıaqtalǵanyna 70 jyldan astam ýaqyt bolsa da, qııan-keski shaıqastardaǵy aǵa býynnyń erligin, tylda qalǵandardyń qajyrly eńbegin keıingi urpaq esh ýaqytta umytpaq emes. Qazaqstan halqyna orasan zor zardap ákelgen soǵysta jeńiske jetýge qazaqstandyqtar ólsheýsiz úles qosty. Sonyń ishinde Batys Qazaqstan oblysynan túlep ushqan batyrlar az bolǵan joq. Talaıy qan maıdanda qaza tapty. Onyń ústine Stalıngrad maıdany tıip turǵandyqtan, Jánibek pen Orda (qazirgi Bókeı ordasy) aýdandary soǵys jaǵdaıynda dep jarııalansa, Oralǵa qorǵanys kásiporyndary kóshirildi, áskerı gospıtaldar ornalasty.
 

Atalmysh kitapta sol qanquıly soǵysqa qatysqandar jóninde barynsha keńinen syr shertiledi. Oblystan shyqqan Keńes Odaǵynyń Batyrlary men Dańq ordeniniń tolyq ıegerleri jóninde jeke taraýlar berilgen. Tyń derekter de barshylyq.

«Bul kitap ótkendi umytpaý úshin kerek. Qazir bizdiń qatarymyz seldiredi. Soǵysty kózben kórgender kún sanap azaıyp barady. Sondyqtan Otanyn qorǵaǵandar jóninde jastarǵa únemi aıtyp otyramyz», dedi 92 jastaǵy maıdanger Venıamın Skolenko.

Aıta keteıik, 500 dana taralymmen shyqqan kitap oblystaǵy ár kitaphanaǵa berilmek.