Oralda turǵyn úıdiń aýlasynan esirtki zerthanasy tabyldy
BQO polıtsııa departamenti esirtki qylmysyna qarsy kúres basqarmasynyń qyzmetkerleri «Qarasora – 2022» jedel aldyn alý is-sharasy kezinde anyqtaǵanyndaı, Oral qalasynyń 1971 jylǵy turǵyny qarasora ósiretin jylyjaıdy uıymdastyrǵan.
Basqarma bastyǵynyń mindetin ýaqytsha atqarýshy, polıtsııa podpolkovnıgi Ánýar Halelovtiń aıtýynsha, atalǵan turǵyn tyıym salynǵan ósimdikterdi ósirý úshin úıiniń aýlasyna arnaıy jabdyqtar ornatyp, tyńaıtqyshtar satyp alǵan.
«Úıdiń aýlasynan jasyryn qorshalǵan bólme tabyldy, onyń ishinde qarasora tárizdi ósimdikteri bar bes plastıkalyq konteıner boldy. Sondaı-aq garajda esirtki zerthanasy retinde jabdyqtalǵan jasyryn jertóle anyqtaldy. Qabyrǵalary arnaıy materıalmen qaptalǵan, ósimdikterdi ósirýge arnalǵan jaryq shashqysh jáne jylý shamdarymen jabdyqtalǵan, sorý júıeleri, gradýstyq qurylǵylary bar aýa ylǵaldandyrǵysh ornatylǵan. Tintý kezinde qarasora tárizdi ósimdik butalary, belgili bir ıisi bar jasyl ósimdik tektes zat, qarasora tuqymyn oraý, elektrondyq tarazy, ósimdikterdi ósirýge arnalǵan túrli tyńaıtqysh tárkilendi. Tıisti saraptama taǵaıyndaldy, - dedi Á.Halelov.
Qazirgi kezde atalǵan derek boıynsha QR QK 300-baby 1-bóligine (quramynda esirtki zattary bar, ósirýge tyıym salynǵan ósimdikterdi zańsyz ósirý) sáıkes sotqa deıingi tergeý amaldary júrgizilýde.
Bul bap boıynsha aıypty dep tanylǵan adam eki myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty júz saǵatqa deıingi merzimge qoǵamdyq jumystarǵa tartýǵa ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
Foto: polisia.kz
