Oralda sý qubyrynda taǵy da apat boldy

ORAL. KAZINFORM — Oral qalasyna qarasty Zachagan kentinde dıametri 160 mm sý qubyry jaryldy.

«Batys sý arnasy» JShS-nyń málimetine qaraǵanda, oqıǵa 23 qyrkúıek kúni saǵat 08.00-de boldy.

Atalmysh qubyr arqyly M.Móńkeuly kóshesindegi 108/5 jáne 108/6-mekenjaıynda ornalasqan toǵyz qabatty eki úı (360 abonent) sýmen qamtamasyz etiledi.

— Apatty joıý jumystaryn kepildik mindettemeler arasynda «Jaıyq sıtı» JShS júrgizedi. Bul mekeme Oral qalasy qurylys bóliminiń tapsyrysy boıynsha ınjenerlik jelilerdi tartýmen aınalysady. Apatty qalpyna keltirý jumystary kezinde salqyn sý berýde úzilister bolýy yqtımal, — dep habarlady vedomstvodan.

Sonymen qatar «Batys sý arnasy» JShS Ázerbaıjan kóshesinde dıametri 400 mm jańa sý qubyryn iske qosýǵa baılanysty 24 qyrkúıek kúni shamamen saǵat 11.00-den bastap 25 qyrkúıek saǵat 05.00-ge deıingi merzimde birqatar mekenjaıǵa salqyn sý berý toqtatylatynyn habarlady.

Atap aıtqanda, Ázerbaıjan, T.Bıgeldınov kóshesi, 25-Chapaev dıvızııasy kóshesi, 23, Baıtaq 2/2 (BQO boıynsha qylmystyq-atqarý júıesi departamenti), «Balaýsa» shaǵynaýdany ýaqytsha sýsyz qalmaqshy.

Eske sala keteıik, budan buryn qubyrdaǵy apat saldarynan Oraldyń bir bóligi sýsyz qalǵanyn jazǵan edik.