Oralda shybyn-shirkeımen kúreske 93 mln teńge bólindi
BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Mırjan Nurtazıevtiń óńirlik kommýnıkatsııalar qyzmeti alańynda ótken brıfıngide málim etkenindeı, 2021-2023 jyldary Oral men qala aýmaǵynda profılaktıkalyq dezınsektsııa júrgizýge konkýrstyq rásimderdiń qorytyndysy boıynsha «Magtoksın» JShS-men 291,2 mln teńgege kelisim-shart jasalǵan.
Onyń sózine qaraǵanda, bıyl shybyn-shirkeımen kúres sharalary 93 306,0 myń teńgege eki kezeńde júrgizilmek.
Dernásilderge qarsy shahar men qala mańyndaǵy eldi mekenderde 2 myń ga aýmaq aspaly búrikkishtermen óńdeledi.
«Birinshi kezeń sáýirde bastalyp, mamyr aıynyń ortasyna deıin jalǵasady. Sodan keıin masalar qanattanǵan kezde óńdeý jumystary 11 myń gektar aýmaqty qamtıdy. Bul jumystar kún batqannan tańǵa deıin júrgiziledi. Bıylǵy is-sharalar barysy kúnbe-kún qoǵamdyq keńes múshelerin, depýtattardy qatystyra otyryp, baqylanatyn bolady. Eger jumystyń tıimdilik kórsetkishi qanaǵattanarlyq bolmasa, ol jer ónim berýshi esebinen qaıtadan óńdeledi», dedi M.Nurtazıev.
«Magtoksın» JShS ókili Danııar Bazarbaevtyń aıtýynsha, shahar men qala mańynda jyl saıyn derlik Jaıyq, Shaǵan jáne basqa ózen-sýlardaǵy tasqyn saldarynan shybyn-shirkeımen qolaısyz jaǵdaı qalyptasady. Turǵyndardan da jıi shaǵym túsedi.
«Shybyn-shirkeımen kúres qymbat jáne kóp ýaqytty qajet etetin jumys bolǵanymen, bıyl da tıisti is-sharalar atqarylady», dedi D.Bazarbaev.
