Oralda saılaýshylarǵa kontsert qoıyldy
Ansambl músheleri ýchaskege kireberiste án-bıden shashý shashyp, ádemi sahnalyq kıimderimen daýys berýge kelgenderdi nazar aýdartty.
«Ár adam halyqqa óziniń qolynan keletin ispen qyzmet etýi tıis. Bizdiń ujym da búgin daýys berip qana qoımaı, ýchaskege kelgen turǵyndarǵa merekelik kóńil-kúı syılaýǵa tyrysty. Án shyrqap, bı bıledik. Saılaý – úlken saıası mereke. Qazaqtyń qaı merekesi án-bısiz ótpegen. Sol sebepti kópshilikke kóterińki kóńil-kúı syılaýdy uıǵardyq» – dedi ujym jetekshisi Lıazzat Kópeshova.
«Juldyz shoýdyń» bastamasyn «ALASH» etno-folklorlyq ansambli qoldady.
№483 saılaý ýchaskesine kelgen oblysqa tanymal ansambl ulttyq aspaptarda shoqtyǵy bıik shyǵarmalardy oryndap, saılaýshylarǵa rýh berdi.
Ansambl jetekshisi Tımýr Meńdiǵalıevtiń aıtýynsha, «ALASH» ansambli 2019 jyly qurylǵan. Onyń quramynda shańqobyz, úskirik, adyrna, nar qobyz, múıiz syrnaı, jetigen, sybyzǵy sekildi kóne aspaptardy meńgergen ónerpazdar bar.
«Bizdiń ansambl 11 adamnan turady. Árqaısymyz qalanyń ár qıyrynda turamyz, ár ýchaskeden daýysymyzdy beremiz. Soǵan qaramastan sahnalyq kıimderimizdi kıip, aspaptarymyzdy asynyp, búgingi saıası merekeniń mazmunyn arttyraıyq dep sheshtik. Sebebi, ár adamnyń daýysy mańyzdy. Bıylǵy saılaý Prezıdentimizdiń saıası reformalarynyń nátıjesi. Konstıtýtsııaǵa engizilgen ózgerister eldiń saıası damýyna tyń serpin alyp keleri sózsiz», - deıdi ansambl jetekshisi Tımýr Meńdiǵalıev
Babalarymyzdyń rýhyn ulttyq aspaptarymyzdyń syrly sazy arqyly erekshe kásibı sheberlikpen oryndap júrgen ujymǵa saılaýshylar tánti boldy. Saıası naýǵanǵa erekshe sán bergen ónerpazdarǵa saılaýshylar alǵystaryn bildirdi.
