Oralda «Rýhanı jańǵyrý» aıasynda «Dástúr» sharasy uıymdastyryldy

ORAL. QazAqparat - Búgin Oral qalasyndaǵy jańa alańda «Rýhanı jańǵyrý» baǵdarlamasy aıasynda «Dástúr» atty mádenı-aǵartý, kópshilik sharalary ótti, dep habarlaıdy «QazAqparat» tilshisi.

Qazaqstan halqy BQO assambleıasynyń «Etnostar kúni» jobasyna sáıkes qazaq halqynyń salt-dástúrlerine arnalǵan sharaǵa barlyq aýdandar, joǵary jáne arnaýly oqý oryndary qatysty. Alańda kıiz úıler tigilip, tusaý kesý, bata berý sekildi ulttyq salt-dástúrlerden kórinister qoıyldy. Qolóner kórmesi, ulttyq oıyndar kezegimen ótip jatty.

Sharaǵa qatysqan oblys ákiminiń birinshi orynbasary Arman Óteǵulov Elbasynyń «Bolashaqqa baǵdar: rýhanı jańǵyrý» atty baǵdarlamasyna sáıkes halqymyzdyń san ǵasyrlyq salt-dástúrlerin nasıhattaý, ulttyq qundylyqtardy ornyqtyrý, jas urpaqty otanshyldyq rýhta tárbıeleý maqsatynda óńirde osyndaı jobalardyń qolǵa alynyp jatqandyǵyn jetkizdi. Mundaı ıgi sharalar aldaǵy ýaqytta da jalǵasyn tabatyn bolady.

Qadyr Myrza Álı atyndaǵy ortalyq aldynda aqyndar men ǵalymdar, zııaly qaýym ókilderi jastarmen kezdesip, óleńder oqylyp, ulttyq tárbıe tóńireginde oı qozǵaldy.

Ulttyq salt-dástúrdi nasıhattaǵan shara óńir ónerpazdary qoıǵan kontsertke ulasty.