Oralda poıyz aıaǵyn basyp ketken er adam tiri qaldy

Oralda poıyz aıaǵyn basyp ketken er adam tiri qaldy, dep habarlaıdy Kazinform.

BQO densaýlyq saqtaý basqarmasynyń baspasóz qyzmetinen málim etkenindeı, oqıǵa 7 qarasha kúni Belaıa kazarma aýdanyndaǵy temir jol boıynda boldy.

«Oblystyq jedel medıtsınalyq járdem stantsııasy» MKK «103» operatoryna saǵat 14.45-te habar túsken. Oqıǵa ornyna 5 mınýtta jetken jedel járdem brıgadasy rels janynda jatqan, aıaǵyn poıyz basyp ketken er adamdy oblystyq kópbeıindi aýrýhanaǵa shuǵyl jetkizdi. Jaǵdaıy óte aýyr, kóp qan joǵaltýyna baılanysty es-tússiz kúıde jatqan jáne III-IV dárejede travmatıkalyq shok alǵan 33 jastaǵy er adamǵa travmatolog, reanımatolog, neırohırýrg, anestezıolog mamandardyń qadaǵalaýymen shuǵyl ota jasaldy. Qazirgi ýaqytta patsıenttiń jaǵdaıy qalypty, aýyr. Jansaqtaý bóliminen palataǵa shyǵaryldy. Dereý kómek kórsetip, ómirin aman alyp qalǵan dárigerler men medıtsına qyzmetkerlerine alǵysyn aıtýda. Naýqasqa eńbek ótili 20 jyldan asatyn dáriger-travmatolog Qanat Ótegenov jáne hırýrg-travmatolog Erǵalı Baıqatov jedel ota jasady. Sondaı-aq otaǵa anestezıolog Aıbek Túrkpenov, reanımatolog Arman Dúısalıev, anestezıst Galına Astova jáne medbıke Nuraı Ǵazez qatysty», dep habarlady vedomstvodan.

QR ІІM Kóliktegi polıtsııa departamentiniń baspasóz qyzmeti tolyqtyrǵanyndaı, atalǵan derek Oral stantsııasyndaǵy jelilik polıtsııa bóliminiń sotqa deıingi tergep-tekserýdiń birińǵaı tizilimine QR Qylmystyq kodeksiniń 344-baby 1-bóligimen, ıaǵnı temirjol kóligi júrisi nemese olardy paıdalaný qaýipsizdigi qaǵıdalaryn buzý boıynsha tirkeldi. Qazirgi ýaqytta tergep-tekserý amaldary júrgizilýde.

Ózge aqparat QR Qylmystyq-protsestik kodeksi 201-babynyń talaptaryna sáıkes tergeý múddesine oraı jarııa etilmeıdi.