Oralda «Ózbekáli jáne mádenı maıdan» kitabynyń tanystyrylymy ótti
«AMANAT» partııasy BQO fılıaly ǵımaratynyń zalynda «Ózbekáli jáne mádenı maıdan» kitabynyń (avtorlary Sanjar Kerimbaı men Ádilbek Nábı) tanystyrylymy boldy, dep habarlaıdy Kazinform.
Saltanatty rásimde jańa kitaptyń tusaýyn mádenıet salasynyń ardagerleri Sara Tanabaeva, Qujyrǵalı Tóleýishev jáne pedagogıka ǵylymdarynyń doktory Svetlana Bahısheva kesti.
Osyndaı qundy kitaptardyń shyǵýyna muryndyq bolyp júrgen «Otbasy hrestomatııasy» jobasynyń negizin salýshy zańger, Májilis depýtaty Abzal Quspan memleket jáne qoǵam qaıratkeri Ózbekáli Jánibekovti kózi qaraqty, oqyǵan-toqyǵany, qazaq mádenıetinen habary bar kópshiliktiń jaqsy biletinin jetkizdi.
«Kitaptyń ataýyna zer salaıyq. Mádenı maıdan qaı kezde de júrip jatyr. Táýelsizdik alǵannan beri de jastarymyz sol mádenı maıdannyń qurbany boldy deýge negiz bar. Buryn bir eldiń mádenı ekspantsııasyna tap bolsaq, qazir birneshe eldiń, neshe túrli dinı aǵymdardyń shabýylyn bastan keshirip jatyrmyz. Mine, sondyqtan da óz tarıhymyzdy túsinip, mádenıetimizdi qorǵap qalý úshin bul kitaptyń mańyzy óte-móte zor», - dedi A.Quspan.
Kezdesýde Qazaqstannyń eńbek sińirgen qaıratkeri, tarıh ǵylymdarynyń kandıdaty, QR Ulttyq arhıviniń tuńǵysh dırektory Rysty Sarıeva da sóz aldy.
«Tarıhı Bókeı ordasy aýdanynyń týmasy bolǵanymmen, 24 jasymda turmys qurýyma baılanysty elden jyraq ketip, Torǵaı oblysynda qyzmet atqardym. Mine, sol kezde Ózbekáli Jánibekulymen jumystas boldym, qamqorlyǵyn kórdik. Biz sol kisiniń tárbıesin alyp, qazaq halqynyń mádenıetin, arǵy-bergi tarıhyn qurmetteýdi úırendik. Torǵaı oblysynda qazaq drama teatryn, ataǵy talaı jerge jaıylǵan «Torǵaı áýenderi» ansamblin, ólketaný mýzeıin ashqan sol kisi edi. Ózi shaqyrǵan ártisterdiń, basqa da óner adamdarynyń jaǵdaıyn jasady. Qyzmetkerlermen birge uıqtamaı, mýzeıdiń árleýine ózi atsalysty. Eńbekqor dep sony aıt, janashyr dep sony aıt! Qazaqtyń kóne buıymdaryn, kıiz, kilem, alashalaryna deıin jınady. Etnograf, sýretshi retinde oıý-órnekterdi óz qolymen saldy. Keıin Ózaǵańnyń qolastynda Qazaqstan Ortalyq partııa komıteti bólim meńgerýshisiniń orynbasary qyzmetin de atqardym», - dedi ol.
Budan keıin kitap avtorlarynyń biri, shyǵystanýshy Sanjar Kerimbaı «Ózbekáli jáne mádenı maıdannyń» qalaı jazylǵanyna jan-jaqty toqtaldy.
«Osy kitapty jazý barysynda kóptegen adamdarǵa jolyǵyp, Ózaǵań týraly talaı syrǵa qanyqtym. Kitaphanada otyryp, derekterdi aqtardym. Ózbekáli Jánibektiń ultqa, mádenıetke, tarıhqa degen qushtarlyǵynyń qaıdan bastaý alǵanyn sezine tústim. Ol kisiniń kishipeıildiligi sondaı, «Taǵdyr taǵylymy» atty kitabynda ózi týraly kóp nárseni aıtpaı ketken eken. Mine, sonyń ornyn toltyrýǵa tyrystyq. Mundaı kitapty oqyp, ǵıbrat alý, ásirese, jastar úshin kerek», - dedi S.Kerimbaı.
