Oralda onkologııalyq aýrýlardy erte anyqtaıtyn endoskopııalyq dıagnostıka ortalyǵy ashyldy
ORAL. KAZINFORM — Oral qalasyndaǵy BQO onkologııalyq dıspanserinde endoskopııalyq dıagnostıka ortalyǵy ashyldy.
Jańa ortalyq asqazan obyry, ókpeniń qaterli isigi jáne basqa keselder boıynsha jyl saıyn tegin sıpatta 1500-den astam zertteý júrgizýge múmkindik beredi. Onkologııalyq aýrýlardy erte anyqtaýda sheshýshi ról atqarmaq. Sondaı-aq patsıentterdiń jalpy ómir súrý jaǵdaıyn aıtarlyqtaı jaqsartýǵa septespek.
Ortalyqtyń ashylý rásimine qatysqan oblys ákiminiń orynbasary Baqytjan Narymbetovtiń atap ótkenindeı, 2023-2027 jyldarǵa arnalǵan onkologııalyq aýrýlarmen kúres jónindegi keshendi jospar aıasynda buǵan deıin Oral qalasynda ıadrolyq medıtsına ortalyǵy jáne kásipkerler men metsenattardyń qoldaýymen pallıatıvti kómek ortalyǵy ashylǵan edi. Endi munyń qataryna endoskopııalyq dıagnostıka ortalyǵy qosylyp otyr.
«Oral qalasynda endoskopııalyq dıagnostıka ortalyǵynyń ashylýy – onkologııalyq aýrýlarmen kúres jónindegi 2023-2027 jyldarǵa arnalǵan keshendi jospardy júzege asyrýdaǵy mańyzdy qadam. Zamanaýı jabdyqtar men ozyq dıagnostıkalyq tehnologııalardyń arqasynda biz patsıentterdiń ómir súrýin jaqsartýda sheshýshi ról atqaratyn qaterli isik aýrýyn erte anyqtaý deńgeıin aıtarlyqtaı arttyra alamyz. Qazirgi tańda búkil álem ókpeniń qaterli isigin skrınıng arqyly anyqtaýǵa kóshti. Osy oraıda biz arnaıy baǵdarlama daıyndadyq. Keseldi erte anyqtaý úshin kompıýterlik tomografııadan ótkizý mańyzdy. Eń aldymen únemi temeki shegetin adamdardy tekserýden ótkizemiz. Jalpy, atalmysh ortalyq árbir muqtaj adamǵa ýaqytyly kómek kórsetýge múmkindik beredi», - dedi Qazaq onkologııa jáne radıologııa ǵylymı-zertteý ınstıtýtynyń basqarma tóraıymy, QR Densaýlyq saqtaý mınıstrliginiń shtattan tys bas onkology Dılıara Qaıdarova.
Sońǵy halyqaralyq standarttarǵa sáıkes keletin jáne sandyq sheshimder engizilgen ozyq endoskopııalyq jabdyq derekterdi tirkeý jáne usyný kezinde meılinshe dálirek nátıjelerge qol jetkizýge jol ashady. Jańa qurylǵynyń artyqshylyǵy - naýqasty 7-10 mınýt ishinde tekserip, dıagnoz qoıýǵa bolady.
Aıta ketsek, 2023 jyldyń sońyndaǵy málimetke sáıkes, Qazaqstanda 218 213 onkologııalyq patsıent tirkelgen. QR Densaýlyq saqtaý mınıstrliginiń aqparaty boıynsha jyl saıyn 40 myńǵa jýyq qazaqstandyq qaterli isikke tap bolyp, 13 myńǵa jýyq naýqas onkologııadan kóz jumady.
Onkologter kelesi qadam retinde qyrkúıek aıynyń ortasynda Almatyda Qazaq onkologııa jáne radıologııa ǵylymı-zertteý ınstıtýtynyń (QazORǴZI) bazasynda ekinshi ortalyqtyń ashylýy josparlanǵanyn jetkizdi. Bul Qazaqstannyń ońtústiginde zamanaýı dıagnostıkalyq qyzmetterge qoljetimdilikti keńeıte túsedi. Medıtsına qyzmetkerleriniń biliktiligin arttyrý jáne dıagnostıka daǵdylaryn jaqsartý úshin birqatar oqytý trenıngin ótkizý de kózdelip otyr.
Eske sala keteıik, budan buryn Batys Qazaqstanda jatyr moıny obyrynan ólim kórsetkishi 33,3 paıyzǵa ósip otyrǵanyn jazǵan bolatynbyz.
