Oralda muz ústinde júrgen aqqý beınetaspaǵa túsip qaldy

ORAL. KAZINFORM — Oral qalasyndaǵy Sadovskoe kólinde aqqýdyń muz ústinde júrgeni týraly beınejazba áleýmettik jelide jarııalandy.

Belgili baǵban, Oraldaǵy botanıkalyq baqtyń basshysy Qaırat Kárimovtiń málim etkenindeı, kóldegi muzdyń qatqanyna biraz boldy, aıaz kúsheıip keledi.

— Aqqýlar áli kólde muz ústinde júr. Bıylǵy balapandar. Nelikten ekeni belgisiz, ushýǵa asyǵar emes. Munyń sebebi, balapandar alysqa ushýǵa kúsh jınamaǵan bolar. Úlkenderi solardy kútip júrgen sııaqty. Kún saıyn solarǵa qarap qoıyp, alańdaımyn, — deıdi Q.Kárimov.

Osy oqıǵaǵa oraı Kazinform tilshisi oraldyq ornıtolog-ǵalym Mıhaıl Shpıgelmannyń pikirin bilgen edi.

— Aqqýlardyń qystap shyǵýy múmkin emes. Óıtkeni olar sý ósimdikterimen qorektenedi. Qar jaýyp, muz qatqannan keıin jyly jaqqa kete almasa, túlki jep qoıady. Menińshe, aqqýlardy aman alyp qalýdyń bir joly — jeke úıi bar turǵyndar olardy qazdarmen birge asyrap shyǵýy kerek, — dedi M.Shpıgelman.

Eske sala keteıik, budan buryn SQO-da muz qursaýynda qalǵan aqqýdyń qutqarylǵanyn jazǵan edik.