Oralda «Memlekettik til jáne BAQ» baıqaýy márege jetti

ORAL. QazAqparat - «Jaıyq Press» JShS-nyń májilis zalynda oblystyq «Memlekettik til jáne BAQ» baıqaýy qorytyndylanyp, jeńimpaz-júldegerler marapattaldy, - dep habarlaıdy «QazAqparat» tilshisi.

BQO memlekettik tilderdi damytý basqarmasynyń tapsyrysymen «Eýrazııa áleýmettik-gýmanıtarlyq zertteý ortalyǵy» qoǵamdyq birlestigi uıymdastyrǵan dástúrli baıqaýdyń maqsaty - memlekettik til saıasatyn buqaralyq aqparat quraldarynda keńinen nasıhattaý. Basqarma basshysy Aıgúl Myńbaevanyń aıtýynsha, baıqaýǵa til taqyrybynda qalam terbep júrgen jýrnalısterden barlyǵy qyryqtan astam jumys tústi.

Qazylar alqasynyń sheshimimen «Jaıyq Press» JShS Terekti aýdandyq «Terekti jańalyǵy» gazetiniń jaýapty hatshysy Ádilet Orynbasarov «Úzdik maqala», «AQJAI'YQ» telearnasynyń redaktory Munaıdar Balmolda «Úzdik telearna baǵdarlamasy», oblystyq «Oral óńiri» gazetiniń tilshisi Gúlsezim Bııasheva «Úzdik saıt maqalasy», «Qazaqstan» RTRK» AQ BQO radıosynyń redaktory Jamal Qadyrova «Úzdik radıobaǵdarlamasy» atalymy boıynsha ozyq shyqty. Olarǵa 75 myń teńgelik sertıfıkattar tapsyryldy. Oǵan qosa birqatar jýrnalısterdiń eńbegi alǵyshat jáne aqshalaı syılyqpen (15 myń teńgeden) atalyp ótti.

Aıta keteıik, 6 jeltoqsan kúni Terekti aýdandyq mádenıet úıinde óńirge tanymal jas aqyn ári jýrnalıst Ádilet Orynbasarovtyń «Taý balasy» atty tuńǵysh kitabynyń tusaýy kesilgen bolatyn.