Oralda «Memlekettik rámizder - maqtanyshym!» sharasy márege jetti
Qazaqstannyń memlekettik Týy men Eltańbasy sahna tórine shyǵarylǵannan keıin Gımn oryndaldy.
Jınalǵandardy merekemen Oral qalasynyń ákimi Narıman Tóreǵalıev quttyqtap, eldiń el, memlekettiń memleket ekendigin aıqyndaıtyn memlekettik rámizderdiń ár azamat úshin qasterli ekendigin jetkizdi. Rámizderdiń qasıettiligi sol, Otannyń ózi naq osy Týdan, Eltańba men Gımnnen bastaý alady. Olardy júregine basyp, mańdaıyna tıgizip, qadirleý arqyly egemen eldiń eńseli azamattary qalyptasyp, bıikterge qadam basady. Tarıhy tereń, búgini aıqyn, bolashaǵy zor Qazaqstannyń odan ári qarqyndy damýy úshin ár adam óziniń súbeli úlesin qosa bilýi tıis.
Saltanatty shara barysynda batyrlyǵymen kózge túskender, sportta tabystarǵa qol jetkizgen, bilimimen, darynymen daralanǵandar marapattalyp, alǵyshattar tabys etildi. Olardyń arasynda QR Ulttyq ulany «Batys» óńirlik qolbasshylyǵyna qarasty 5517-áskerı bóliminiń kelisimshartpen qyzmet etetin qatardaǵy jaýyngeri Qýanysh Saılaýov bar. Ol bıylǵy 10 mamyr kúni «Keńdala» shaǵynaýdanyndaǵy «Amanǵalı» dúkeniniń janynda oraldyq turǵyn Aleksandr Fedınmen birge qaraqshylarǵa toıtarys bergen. Betperde kıip, pyshaqpen jáne elektrshokermen qarýlanyp, mototsıklge mingen ekeý A.Fedınge shabýyl jasap, onyń iri kólemdegi aqshasyn tartyp almaq bolǵan. Sol kezde dúkende bolǵan Q.Saılaýov aıqaı-shýdy estigen boıda kóshege júgirip shyǵyp, álgilerge ádis qoldanyp, Aleksandrmen birge adam tonaýshylardyń oıyn júzege asyrtpaǵan. Sol sekildi Bórli aýdandyq ishki ister bólimi jergilikti polıtsııa qyzmeti ýchaskelik polıtsııa ınspektorynyń kómekshisi, polıtsııa aǵa leıtenanty Nurbek Sársenǵalıev 5 sáýir kúni Aleksandrov aýylynda qurbysymen oınap júrgende, muz oıylyp, sýǵa ketip qala jazdaǵan kishkentaı qyzdy qutqarǵan. Oraldyq balǵyn ánshi, ótken jyly birneshe halyqaralyq baıqaýda jeńimpaz-júldeger atanyp úlgergen Erjan Maksım mamyr aıynyń basynda Italııanyń San-Remo festıvalinde sondaǵy sımfonııalyq orkestrdiń súıemeldeýimen án oryndap, birinshi orynǵa ıe boldy. M.Ótemisov atyndaǵy Batys Qazaqstan memlekettik ýnıversıtetiniń 1-kýrs stýdenti Gaýhar Ermaǵambetova Taraz qalasynda dzıýdodan ótken ІV Qazaqstan jastar oıyndarynyń qola júldegeri atandy. Á.Moldaǵulova atyndaǵy №38 mektep-lıtseıiniń shákirti, 2016-2017 oqý jylynyń «Jyldyń úzdik oqýshysy» atalymynyń jeńimpazy, «Altyn belgiden» úmitker Dana Erǵalıqyzynyń tabystary da az emes. Ol, mysaly, Aqtaý qalasynda ótken respýblıkalyq pán olımpıadasynda qazaq tili men ádebıeti páninen birinshi oryn alyp, sondaı-aq respýblıkalyq «Jarqyn bolashaq» olımpıadasynda jeńimpaz, Súleımen Demırel atyndaǵy ýnıversıtettiń jýrnalıstıka fakýltetiniń grant ıegeri atanyp, Q.Bitibaeva atyndaǵy qazaq tili men ádebıeti olımpıadasynda úshinshi satyǵa kóterildi.
Shara barysynda oraldyq belgili ustaz, eńbek ardageri Sofııa Imanǵalıeva, Oral munaı, gaz jáne salalyq tehnologııalar kolledjiniń stýdenti, ýkraın etnomádenı ortalyǵy jastar qanatynyń belsendisi, qazaq tilinde erkin sóıleıtin Aleksandr Gýbar ıgi tilegin bildirse, jas oryndaýshylar patrıottyq ánderdi áýelete shyrqady.
