Oralda qumar oıyn oınaǵan 16 sheneýnik jumystan shyǵaryldy
ORAL. KAZINFORM – Oral qalasy ákimdiginiń, memlekettik kirister jáne qalalyq polıtsııa basqarmalarynyń jekelegen laýazymdy tulǵalary býkmekerlik keńseler arqyly qumar oıyndarǵa qatysqan.
2024 jylǵy 15 naýryzda Atyraý qalasynda ótken Ulttyq quryltaı otyrysynda Memleket Basshysy jarııalaǵan tapsyrmaǵa sáıkes, sybaılas jemqorlyqqa qarsy is-qımyl týraly zańnamaǵa ózgerister engizildi.
2024 jylǵy 9 qyrkúıekten bastap, memlekettik qyzmetshilerdiń, onyń ishinde onlaın formatta, qumar oıyndary men bás tigýge qatysýy sybaılas jemqorlyqqa qarsy shekteýlerdi buzý bolyp tanylady.
Oral qalasynyń prokýratýrasy osy normalardyń saqtalýyna taldaý júrgizdi. Anyqtalǵandaı, Oral qalasy ákimdiginiń, memlekettik kirister jáne qalalyq polıtsııa basqarmalarynyń jekelegen laýazymdy tulǵalary býkmekerlik keńseler arqyly qumar oıyndarǵa qatysqan.
Atalǵan faktiler boıynsha Oral qalasynyń prokýratýrasy Oral qalasy ákimdigine, Batys Qazaqstan oblysynyń memlekettik kirister basqarmasyna jáne Polıtsııa departamentine qadaǵalaý aktileri engizdi.
— Olardy qaraý qorytyndysy boıynsha 24 laýazymdy tulǵa tártiptik jaýapkershilikke tartylyp, onyń ishinde 16-sy atqaryp otyrǵan laýazymdarynan bosatyldy. «OLIMPBET» JShS-niń málimetterine sáıkes Oral qalasy ákimdiginiń bir qyzmetkeri 2021 jylǵy 5 maýsym men 2025 jylǵy 22 qańtar aralyǵynda óziniń jeke shotyna 34 047 142 teńgeden astam qarajat salǵan. Onyń ishinde, zańnamadaǵy ózgerister kúshine engennen keıin 1 741 000 teńge salyp, onyń 971 000 teńgesin utylǵan. Osy mán-jaılarǵa baılanysty atalǵan qyzmetker laýazymynan bosatyldy, — delingen Batys Qazaqstan oblysynyń prokýratýrasy taratqan habarlamada.
Oral qalasynyń prokýratýrasy sybaılas jemqorlyqqa qarsy zańnamanyń, onyń ishinde sybaılas jemqorlyqqa qarsy shekteýlerdiń saqtalýyna júıeli túrde qadaǵalaý júrgizýdi jalǵastyrady.
Aıta ketelik Sax Invest uıymdastyrýshysy salymshylardyń qarajatyn kazınoda utylyp, saıahattarǵa jumsaǵan.