Kirpishi qulaǵan úı 60 jyldan beri jóndeý kórmegen – Oral ákimdigi

Oralda kirpish tas qulaǵan úı 60 jyldan beri jóndeý kórmegen, dep habarlaıdy Kazinform.

Budan buryn jazǵanymyzdaı, Oralda 26 qarasha kúni basyna kirpish tas qulaǵan áıel kóz jumǵan edi.

Osy oqıǵaǵa baılanysty Oral qalasynyń ákimdigi túsinik berdi.

Ákimdik málimetine qaraǵanda, N.Nazarbaev dańǵyly 236-mekenjaıynda ornalasqan 48 páterlik 4 qabatty úı 1963 jyly paıdalanýǵa berilgen.

«Atalǵan úı boıynsha «Juldyz-Alǵa» páter ıeleri kooperatıvi qyzmet kórsetedi. Úıge alpys jyldan beri kúrdeli jóndeý júrgizilmegen. «Juldyz-Alǵa» PIK málimeti boıynsha turǵyn úıdi kúrdeli jóndeý týraly jınalys uıymdastyrylǵan. Alaıda kvorýmnyń bolmaýyna baılanysty úıdi kúrdeli jóndeý jáne «Turǵyn úı-kommýnaldyq sharýashylyǵyn jańǵyrtý» baǵdarlamasyna qatysý týraly sheshim qabyldanbaǵan. «Turǵyn úı qatynastary týraly» QR Zańynyń 32-babyna sáıkes páterlerdiń, turǵyn emes úı-jaılardyń menshik ıeleri kondomınıým obektisiniń ortaq múlkine aǵymdaǵy jáne kúrdeli jóndeý júrgizýdi qosa alǵanda, kondomınıým obektisiniń ortaq múlkin kútip-ustaý jáne onyń qaýipsiz paıdalanylýyn qamtamasyz etý jónindegi sharalardy qoldanýǵa mindetti. Oǵan qosa PIK te, turǵyndar da kóshede úı mańynda turǵan aǵashtardy kesý jóninde qala ákimdigine júginbegen», dep habarlady vedomstvodan.

BQO polıtsııa departamentiniń baspasóz qyzmeti atalǵan oqıǵa adam ólimi retinde sotqa deıingi tergep-tekserýdiń biryńǵaı tizilimine tirkelgenin, soǵan sáıkes tergeý amaldary júrgizilip jatqanyn jetkizdi.