Oralda «Kórshiler» halyqaralyq bilim berý lageri uıymdastyryldy
Lagerdi QR Aqparat jáne qoǵamdyq damý mınıstrliginiń jáne BQO ákimdiginiń qoldaýymen Batys Qazaqstan oblysy boıynsha «Bolashaq» korporatıvtik qory uıymdastyrdy.
Jıynǵa Batys Qazaqstannan basqa Reseıdiń Saratov jáne Samara oblystarynan medıa, mádenıet, kásipkerlik jáne bıznes salalarynda jumys isteıtin belsendi jastar, jastar saıasaty salasyndaǵy sarapshylar, blogerler, jastar uıymdarynyń kóshbasshylary men belsendileri, joǵary oqý oryndarynyń stýdenttik ózin-ózi basqarý qurylymdarynyń ókilderi men basshylary jáne qoǵamdyq uıymdardyń kóshbasshylary, barlyǵy 60-qa jýyq adam keldi.
Sonymen qatar eki jylda bir ret ótkizilip júrgen jıynǵa ózbekstandyq jastar onlaın sıpatta qosyldy.
Atalmysh is-sharanyń negizgi maqsaty – halyqaralyq óńiraralyq jastar yntymaqtastyǵyn keńeıtý, tatý kórshilik qarym-qatynastardy nyǵaıtyp, úzdik ádistemeler, jobalarmen almasý, jastar saıasaty, mádenıet, kásipkerlikti qoldaý salalarynda jastar uıymdarynyń tájirıbelerin zertteý.
Lager aıasynda delegattarǵa arnalǵan «Shabyt» shyǵarmashylyq ortalyǵynyń tanystyrylymy, Oral qalasynyń kórikti jerleri boıynsha tarıhı kvest ótti.
Jastar alaý janynda Oral qalasynyń ákimi Mırjan Satqanovpen júzdesip, pikir almasty. Kezdesý barysynda delegattardan, atap aıtqanda, saratovtyqtardan BQO jastarymen tyǵyz jumys jasaý, ortaq qundylyqtardy nyǵaıtý maqsatynda túrli formattaǵy is-sharalar ótkizý týraly usynystar aıtyldy.
«Kórshi elder jastary arasyndaǵy mundaı qarym-qatynastyń mańyzy zor. Olar lagerde ozyq tájirıbelermen almasady. Sonymen qatar táýelsizdik alǵannan bergi tabys-jetistikterimizdi nasıhattaýǵa múmkindik bar. Jastar saıasaty salasyndaǵy bastamalar kóterilip, jańashyl usynystar aıtylyp, júzege asyp jatsa, bizdiń de maqsattyń oryndalǵany», dedi Mırjan Munaıdaruly.
Sondaı-aq is-shara barysynda qatysýshylar arasynda úzdik komandany anyqtaǵan zııatkerlik oıyn uıymdastyryldy. «Sustainable life: jastardy ekologııalyq tárbıeleý», «Kommýnıkatsııalar jáne medıa: jas jýrnalıster mektebi», «Bıznes ıdeıalar» baǵyttary boıynsha bilim berý trenıngteri boldy.
Trenerler, PR-maman, PR-agenttiginiń basshysy, medıa-menedjer Naına Ergeshova, kásipker, «Bolashaq» halyqaralyq baǵdarlamasynyń túlegi Ulan Baldaqov, «Ulttyq saraptama jáne sertıfıkattaý ortalyǵy» AQ BQOF sektor meńgerýshisi, sertıfıkattalǵan jattyqtyrýshy Aqmaral Elemesova dáristerin ótkizdi. Sol sekildi «Shekarasyz volonterlik» baǵyty boıynsha Asar-ume qaıyrymdylyq qorynyń negizin qalaýshysy Ashat Nurmashevpen kezdesý ótti.
