Oralda esirtki taratýmen aınalysqan ınternet-dúken joıyldy
ORAL. KAZINFORM — Oral qalasynda polıtseıler «Qarasora» jedel aldyn alý is-sharasy barysynda esirtki zattaryn satýmen aınalysqan ınternet-dúkendi anyqtap, qyzmetin toqtatty.
BQO polıtsııa departamentiniń baspasóz qyzmetinen málim etkenindeı, zańsyz isti uıymdastyrǵan Oral qalasynyń 25 jastaǵy turǵyny bolyp shyqty.
Turǵylyqty jerin tintý kezinde erekshe ısi bar, qoıý qońyr tústi ósimdik tektes zat salynǵan 12 túıinshek, elektrondy tarazy, jazbalary bar dápter, oqshaýlaǵysh lenta, zip-paketter jáne noýtbýk tárkilendi.
— Sondaı-aq esirtki jasyrýmen aınalysqan 24 jastaǵy jigit ustaldy. Jeke tekserý kezinde odan bir túıinshek tabyldy. Uıaly telefonyn qaraý barysynda esirtki jasyrǵan 40 orynnyń koordınattary anyqtaldy, sol jerlerden erekshe ısi bar, qoıý qońyr tústi ósimdik tektes zat salynǵan 17 túıinshek tárkilendi. Atalǵan derek boıynsha qylmystyq is qozǵalyp, tergeý amaldary júrgizilip jatyr, — dep habarlady vedomstvodan.
Eske sala keteıik, budan buryn Batys Qazaqstan oblysynda 50-ge jýyq maldy qoldy etkender ustalǵanyn jazǵan edik.