Oraldaǵy baý-baqsha seriktestiginde daý-damaı tyıylmaı tur
Oral qalasyndaǵy «Altyn orda» mádenıet úıinde «Zachaganskıı» baý-baqsha seriktestiginiń jalpy jınalysy ótti, dep habarlaıdy Kazinform.
Jıynda seriktestik tóraǵasy Asylbek Qabesov atqarylǵan jumystar jóninde baıandama jasady. Onyń sózine qaraǵanda, atalmysh baý-baqsha seriktestiginde 1985 úıde 12 myńǵa jýyq adam turady. 1500 oqýshynyń 1067-si Á. Moldaǵulova atyndaǵy № 38 mektep-lıtseıinde, 328-i Melovye gorkı aýylyndaǵy № 18 mektepte bilim alady. Olar arnaıy kólikpen tasymaldanady. Qalǵan balalar basqa mektepterge qoǵamdyq kólik arqyly qatynap oqıdy. Seriktestik aýmaǵynda 4 jeke balabaqsha, 1 dárigerlik ambýlatorııa, 50-ge jýyq azyq-túlik dúkeni, 10-ǵa jýyq kólik jóndeý oryndary bar.
Bıyl seriktestiktiń irgesinen halyqtyń suranysyna sáıkes 600 oryndyq jańa mektep qurylysy bastaldy.
«Seriktestikte úı salynyp, turǵyndar sany ósip jatqanymen, ol zańdy tulǵaǵa jatpaıdy. Oblystyq, qalalyq bıýdjetten eshqandaı qarajat bólinbeıdi. Sondyqtan ómir súrýge qajetti jumystardyń barlyǵy seriktestik músheleriniń tóleýge tıisti jarnalarynyń esebinen atqarylady» — degen A. Qabesov elektr qýaty úshin turǵyndar nelikten qalamen birdeı tólemeıtinin túsindirdi.
Onyń aıtýynsha, 2022 jyldyń 1 qyrkúıeginen bastap «Batys energo resýrsy» JShS baý-baqsha seriktestikteri úshin elektr qýatynyń baǵasyn 1 kVt saǵatqa 21 teńge 20 tıynnan belgilegen. Sol kezde seriktestik tarıfi 24 teńge boldy. 2 teńge 80 tıynnyń qosylý sebebi, elektr qýatynyń shyǵyny eseptegish quraldarmen jalpy esepteledi.
«Buǵan elektr qýatyn transformatsııalaý kezindegi, jelidegi shyǵyndar, sondaı-aq kóshedegi baǵana shamdary, eseptegish qurylǵyǵa soqtyrmaı paıdalanylǵan, ıaǵnı urlanǵan shyǵyndar kirip, bárin bir tóleý mindetteledi. Mysaly, 400 dana baǵana shamdaryndaǵy shyǵynnyń ózi bir aıda 657 200 teńgege jetedi. Bıylǵy 1 qazannan bastap elektr qýatynyń baǵasy ósýine baılanysty bul másele seriktestik basqarmasynyń otyrysynda qaralyp, 1 kVt saǵat úshin 29 teńge bolyp otyr», — dedi A.Qabesov.
Jıynnyń kún tártibine kommýnaldyq qyzmet máseleleri qoıylyp, osyǵan qatysty mekeme ókilderi shaqyrylǵanymen, olarǵa suraq qoıylǵan joq. Qatysýshylardyń bir bóligi seriktestik tóraǵasynyń qyzmetine kóńilderi tolmaıtynyn ashyq bildirip, ornynan ketýin talap etti.
«Qazir Asylbek, seni ornyńnan alamyz. Ashat Baetovti tóraǵa etip saılaımyz. Qalǵan sharýany ekeýiń birigip, bir aıdyń ishinde sheshińder. Elektr qýatyn aıyrsa, aıyra bersin, bir aı maıshammen de otyramyz», — dedi Amanǵalı Qajyken.
A.Qabesov turǵyndardyń elektr qýatyna tólemegen qordalanǵan qaryz bar ekenin sóz etti.
«Áýeli sony óteıik. Sodan keıin jańa tóraǵany saılaý máselesin kún tártibine qoıýǵa bolady. Bul jınalysty jabyq dep jarııalaımyn», — dep jaýap berdi A. Qabesov.
Buǵan rıza bolmaǵandar jınalystyń hatshysyn ózgertip, jańa tóraǵa saılaýdyń qamyna kiristi.
«Turǵyndar seriktestik tóraǵasy turmystyq, kommýnaldyq máseleler boıynsha esep berýi kerek degen soń osy jıyndy ótkizýdi usyndyq. Al tóraǵany aýystyrý — óte aýqymdy másele, onyń óz reti bar. Búgingi jınalysqa 250-deı adam qatysqan bolar. Bul seriktestik turǵyndarynyń qajetti paıyzyna jetpeıdi. Eger qatysýshylar jańa tóraǵa saılaý qajet dep tapsa, oǵan daıyndyq kerek. Onda seriktestikte turatyndardyń jartysynan astamy daýys berip, óz pikirin bildirýi kerek. Seriktestik tóraǵasy aldaǵy jyly osy jyldyń qorytyndysy boıynsha tolyq esep berip, sonda basqarma tóralqasy men tekserý komıssııasynyń quramy jańadan saılansa, durys bolar edi. Sondaı-aq tóraǵalyqqa úsh-tórt kandıdat usynylsa, sonda barlyq pikirler eskerilip, solardyń ishinen laıyqtysyn tańdaýǵa múmkindik bolar edi. Búgin turǵyndardyń bir toby tóraǵa saılasa, buǵan basqa bireýleri kelispeýi múmkin. Saldarynan beı-berekettik týyndaıdy», — dedi jınalysqa qatysqan BQO baý-baqsha seriktestigi qoǵamdyq birlestiginiń basqarma tóraǵasy Andreı Zaozerov.
Eske sala keteıik, budan buryn Oralda turǵyndar baý-baqsha seriktestigi tóraǵasynyń qyzmetine narazylyq bildirgenin jazǵan bolatynbyz.
