Oralda basyna kirpish tas qulaǵan áıel kóz jumdy

Oralda basyna kirpish tas qulaǵan áıel kóz jumdy, dep habarlaıdy Kazinform.

BQO polıtsııa departamentiniń baspasóz qyzmetinen málim etkenindeı, oqıǵa 26 qarasha kúni shamamen saǵat 14.30-da N.Nazarbaev dańǵyly 236-úı janynda boldy.

«Sol tustan ótip bara jatqan áıeldiń basyna tas qulap ketken. Alǵan jaraqattarynyń saldarynan áıel oqıǵa ornynda qaıtys boldy. Qazirgi kezde oqıǵanyń jaı-japsary anyqtalyp jatyr», - dep habarlady vedomstvodan. 

BQO densaýlyq saqtaý basqarmasynyń naqtylaýynsha, jedel járdemge saǵat 14.33-te qońyraý shalynǵan. Jedel járdem brıgadasy 1973 jylǵy áıeldiń tek qaıtys bolǵanyn anyqtady.

Eske sala keteıik, budan buryn BQO-da borandy kúni joǵalyp ketken er adamnyń denesi tabylǵanyn jazǵan bolatynbyz.