Oralda balabaqshada shkaftyń qulaýyna baılanysty tárbıeshi jaýapqa tartyldy
ORAL. KAZINFORM - Oralda balabaqshada shkaftyń qulaýyna baılanysty tárbıeshi jaýapqa tartyldy.
Oral qalasy bilim berý bóliminiń baspasóz qyzmetinen málim etkenindeı, 1 aqpan kúni «Sábı» jeke bóbekjaıynda tárbıelenýshiler oınap júrgen kezde bólmedegi shkaf qulaǵan.
Saldarynan balalar men olardyń janynda bolǵan tárbıeshi zaqym aldy.
«Bolǵan jaǵdaıǵa baılanysty zerdeleý júrgizildi. Top tárbıeshisine qyzmettik mindetin tıisti deńgeıde atqarmaı, balalardyń ómiri men densaýlyǵyna zaqym kelýine jol bergeni úshin qatań sógis túrindegi tártiptik jaza berildi», dep habarlady vedomstvodan.
BQO polıtsııa departamentiniń baspasóz qyzmeti oqıǵa ornynda tártip saqshylarynyń da bolǵanyn, oqıǵanyń jaı-japsary anyqtalyp jatqanyn jetkizdi.
Eske sala keteıik, budan buryn Oralda balabaqshada shkaf qulap, tórt búldirshin men tárbıeshiniń jaraqat alǵanyn jazǵan bolatynbyz.
